ലക്നൗ : ആറ് മാസത്തേക്ക് സംസ്ഥാനത്ത് സമരം നിരോധിച്ച് ഉത്തർപ്രദേശ് സർക്കാർ . സർക്കാർ വകുപ്പുകൾക്കും കോർപ്പറേഷനുകൾക്കും സംസ്ഥാന സർക്കാരിന് കീഴിലുള്ള അധികാരികൾക്കും ഈ നിയമം ബാധകമായിരിക്കും.
അഡീഷണൽ ചീഫ് സെക്രട്ടറി കർമ്മിഷ് ഡോ.ദേവേഷ് ചതുർവേദിയാണ് ഇത് സംബന്ധിച്ച് വിജ്ഞാപനം പുറപ്പെടുവിച്ചത്. എസ്മ നിയമം നിലവിൽ വന്നതിന് ശേഷവും ഏതെങ്കിലും ജീവനക്കാരൻ പണിമുടക്കുകയോ പ്രതിഷേധിക്കുകയോ ചെയ്താൽ നിയമലംഘനം നടത്തുന്നവരെ വാറൻ്റില്ലാതെ അറസ്റ്റ് ചെയ്യുമെന്നും വിജ്ഞാപനത്തിൽ പറയുന്നു.
2023 ലും സംസ്ഥാന സർക്കാർ ആറുമാസത്തേക്ക് പണിമുടക്കുകൾ നിരോധിച്ചിരുന്നു. അന്ന് വൈദ്യുതി വകുപ്പ് ജീവനക്കാർ പണിമുടക്കിയതിനെ തുടർന്നാണ് മുഖ്യമന്ത്രി യോഗി ആദിത്യനാഥ് ആറ് മാസത്തേക്ക് സമരം നിരോധിച്ചത് .
