നടൻ വിജയിയുടെ മകൻ ജേസൺ സഞ്ജയ് ആദ്യമായി സംവിധാനം ചെയ്യുന്ന ചിത്രത്തിൽ ദുൽഖർ സൽമാൻ നായകനാകുമെന്ന് റിപ്പോർട്ട്. തമിഴ് സിനിമാ മാദ്ധ്യമങ്ങളാണ് ഇക്കാര്യം പുറത്തുവിട്ടത്. സിനിമയുടെ ചിത്രീകരണം ഉടൻ ആരംഭിക്കും. കാർ ഫ്രീക്കായ ഒരു യുവതാരത്തെ ആയിരിക്കും ചിത്രത്തിൽ നായകനായി ജേസൺ പരിഗണിക്കുക എന്നായിരുന്നു നേരത്തെ പുറത്തുവന്നിരുന്ന വിവരങ്ങൾ.
ചിത്രത്തിന്റെ പൂജ ചെന്നൈയിൽ വച്ച് നടന്നെന്ന തരത്തിലുള്ള വാർത്തകളും പുറത്തുവരുന്നുണ്ട്. യുവൻ ശങ്കർ രാജയായിരിക്കും ചിത്രത്തിന്റെ സംഗീതം ഒരുക്കുന്നത്. തമിഴിലെ പ്രശസ്ത നിർമ്മാണ കമ്പനിയായ ലൈക്കാ പ്രൊഡക്ഷൻസാണ് ചിത്രം നിർമ്മിക്കുന്നത്. ചിത്രത്തിന്റെ പ്രീ പ്രൊഡക്ഷൻ ജോലികൾ പുരോഗമിക്കുകയാണ്. ഇതിൽ ദുൽഖർ സൽമാൻ പങ്കെടുത്തെന്നും തമിഴ് സിനിമാ മാദ്ധ്യമങ്ങൾ റിപ്പോർട്ട് ചെയ്യുന്നു.
ജേസൺ സഞ്ജയ് നിലവിൽ ചിത്രത്തിന്റെ തിരക്കഥാ രചനയുടെ അവസാന ഘട്ടത്തിലാണ്. ചിത്രത്തിൽ സംവിധായകൻ ശങ്കറിന്റെ മകൾ അദിതി ശങ്കറായിരിക്കും നായികയായി എത്തുക. മകന്റെ ചിത്രത്തിൽ പിതാവും നടനുമായ വിജയ് ആയിരിക്കില്ല നടനാകുന്നതെന്ന വാർത്ത നേരത്തെ പുറത്തു വന്നിരുന്നു. പിന്നാലെ ചിത്രത്തിൽ ധ്രുവ് വിക്രം നായകനാകും എന്ന വാർത്തകളും പുറത്തു വന്നിരുന്നു.
