മലയാളത്തിലെ താര രാജാക്കന്മാർ ഒന്നിച്ച സൂപ്പർഹിറ്റ് ചിത്രമായിരുന്നു ഹരികൃഷ്ണൻസ്. ഇരുവരുടെയും ആരാധകർ മാത്രമല്ല, മലയാളികളെല്ലാവരും ഇന്നും ആഘോഷിക്കുന്ന സിനിമയാണത്. 1998-ലാണ് ഫാസിലിന്റെ സംവിധാനത്തിൽ ചിത്രം പുറത്തിറങ്ങിയത്. അക്കാലത്ത് കേരളക്കരയിൽ തരംഗം തീർത്ത സിനിമയായിരുന്നു ഹരികൃഷ്ണൻസ്.
മമ്മൂട്ടിയുടെയും മോഹൻലാലിന്റെയും നായികയായി എത്തിയതാകട്ടെ ജൂഹി ചൗളയും. ഹരികൃഷ്ണന്മാരുടെ സ്വന്തം മീരയായി ജൂഹി മലയാളി പ്രേക്ഷകരുടെ മനസ് കീഴടക്കി. രണ്ട് നടന രാജാക്കന്മാർ ഒരുമിക്കുന്ന ചിത്രത്തിൽ അവരുടെ നായികയായി എത്തുക എന്നത് എല്ലാ നടിമാരുടെയും ഒരു സ്വപ്നമായിരുന്നു. അതിന് അവസരം ലഭിച്ചത് ജൂഹി ചൗളക്ക്. എന്നാൽ, ഹരികൃഷ്ണൻസിലെ മീനയുടെ വേഷം ആദ്യം എത്തിയത് നടി മീനയുടെ മുന്നിലാണ്. പക്ഷെ, ചെയ്യാൻ സാധിച്ചില്ല. അതിനെപ്പറ്റി തുറന്നു പറയുകയാണ് മീന.
“ഞാൻ കഥ കേട്ട്, എനിക്ക് ചെയ്യണമെന്ന് ആഗ്രഹം ഉണ്ടായിട്ടും ഡേറ്റ് ഇല്ലാതെ വിട്ടുപോയ പല സിനിമകളും വേറെ ആൾക്കാർ ചെയ്തിട്ട് അത് വലിയ ഹിറ്റായിട്ടുണ്ട്. ഡേറ്റ് ക്ലാഷ് ആയി സംഭവിച്ചതാണ്. അത്തരത്തിൽ കുറേ സിനിമയുണ്ട്. അതിലൊന്നാണ് മമ്മൂക്ക-ലാലേട്ടൻ ചിത്രമായ ഹരികൃഷ്ണൻസ്. അവർ തമ്മിലുള്ള കോമ്പിനേഷൻ സീനുകളെല്ലാം കാണുമ്പോൾ ആ ചിത്രം ചെയ്യാൻ കഴിയാത്തതിൽ വിഷമം തോന്നും. ഹരികൃഷ്ണൻ ചെയ്യാൻ സാധിക്കാത്തത് വലിയ ഒരു നഷ്ടമാണ്”- മീന പറഞ്ഞു.
