കൊറിയൻ മ്യൂസിക് ബാൻഡുകൾക്കും സീരീസിലെ താരങ്ങൾക്കും ഇന്ത്യയിൽ വൻ സ്വീകാര്യതയാണുള്ളത്. മാത്രവുമല്ല, കൊറിയൻ ഫാഷൻ ബ്യൂട്ടി ടിപ്സ് ഇതൊക്കെയും യുവാക്കൾ പരീക്ഷിക്കാറുണ്ട്. എന്നാൽ, കൊറിയക്കാർ നമ്മുടെ സംസ്കാരവും വേഷവിധാനങ്ങളും പരീക്ഷിക്കുന്നത് അധികം ആരും കാണാൻ ഇടയില്ല. അത്തരത്തിലൊരു വീഡിയോയാണ് സമൂഹമാദ്ധ്യമങ്ങളിൽ വൈറലാകുന്നത്.
ദക്ഷിണ കൊറിയൻ ഇൻഫ്ലുവൻസർ ദക്ഷിണേന്ത്യൻ വസ്ത്രരീതി പരീക്ഷിക്കുന്നതാണ് വീഡിയോ. ബേ യൂന്-സോ എന്ന ഇന്ഫ്ളുവന്സറാണ് ആരാധകരുടെ മനം കവരുന്ന തരത്തിൽ ദക്ഷിണേന്ത്യൻ വസ്ത്രം ധരിച്ചിരിക്കുന്നത്. സ്വര്ണക്കരയുള്ള വെള്ള ധോത്തിയും കുര്ത്തയും വീതിയുള്ള കരയുള്ള ദുപ്പട്ടയുമാണ് ബേ യൂന്-സോ ധരിക്കുന്നത്. ബേ യൂന്-സോയുടെ സുഹൃത്താണ് ധോത്തിയും കുർത്തയും വാങ്ങി നൽകിയത്. തിരുപ്പതിയിൽ നിന്നാണ് വാങ്ങിയതെന്നും ബേ യൂന്-സോ വീഡിയോയിൽ പറയുന്നുണ്ട്. ഇതിനോടൊപ്പം അദ്ദേഹം ഒരു കുറിപ്പും പങ്കുവച്ചിട്ടുണ്ട്.
‘ഭാരതീയർക്ക് മനോഹരമായ നിരവധി പരമ്പരാഗത വേഷങ്ങളുണ്ട്. അതുകൊണ്ടാണ് ഭാരതീയരുടെ പരമ്പരാഗത വേഷങ്ങളെക്കുറിച്ച് പഠിക്കാനും അത് ധരിക്കാനും ഞാൻ ഇഷ്ടപ്പെടുന്നത്. എന്റെ ബെസ്റ്റ് ഫ്രണ്ടിന്റെ അച്ഛനും അമ്മയുമാണ് തിരുപ്പതിയിൽ നിന്നും ഈ വസ്ത്രം എനിക്ക് അയച്ചു തന്നത്. ഇപ്പോൾ, ബാലാജിയുടെ അനുഗ്രഹവും എനിക്ക് ലഭിച്ചു. അച്ഛനോടും അമ്മയോടും എന്റെ നന്ദി അറിയിക്കുന്നു.’- ബേ യൂന്-സോ കുറിച്ചു.
View this post on Instagram
ഭാരതത്തിലെ വസ്ത്ര ധാരണത്തെ പ്രകീർത്തിച്ച് കൊണ്ടുള്ള കൊറിയൻ ഇൻഫ്ലുവൻസറിന്റെ വീഡിയോ ഇതിനോടകം 2 മില്യൺ ആളുകൾ കണ്ട് കഴിഞ്ഞു. ബേ യൂന്-സോയെ അഭിനന്ദിച്ച് കൊണ്ട് നിരവധിപേർ കമന്റുകളും പങ്കുവച്ചിട്ടുണ്ട്. ഇതിൽ കൂടുതലും ഇന്ത്യക്കാരാണ്.
