രാജ്യമെമ്പാടുമുള്ള ജനങ്ങൾ ശിവരാത്രി ആഘോഷങ്ങളുടെ തിരക്കിലാണ്. വ്രത ശുദ്ധിയോടെ ഉപവാസമിരുന്ന് ശിവ ഭഗവാനിലേക്കുള്ള ലയനമായി പഴമക്കാർ ശിവരാത്രിയെ കണക്കാക്കുന്നു. ഓരോ സ്ഥലങ്ങളിലും ശിവരാത്രി ആഘോഷങ്ങൾ വ്യത്യസ്ത നിറഞ്ഞതാണ്. കേരളത്തിൽ ശിവരാത്രി ആഘോഷിക്കുന്ന പ്രധാനപ്പെട്ട ശിവ ക്ഷേത്രങ്ങളെ കുറിച്ച് അറിയാം..
ആലുവ ശിവക്ഷേത്രം
ശിവരാത്രി ആഘോഷങ്ങളെന്ന് കേൾക്കുമ്പോൾ തന്നെ നമ്മുടെ മനസിൽ ആദ്യമെത്തുന്നത് എറണാകുളം ജില്ലയിൽ പെരിയാറിന്റെ തീരത്ത് സ്ഥിതി ചെയ്യുന്ന ആലുവ ശിവക്ഷേത്രം തന്നെയായിരിക്കും. എല്ലാ വർഷവും കുംഭമാസത്തിൽ ഇവിടെ നടക്കുന്ന ശിവരാത്രി ആഘോഷങ്ങൾ പ്രസിദ്ധമാണ്. പരബ്രഹ്‌മസ്വരൂപനായ മഹാദേവനാണ് ക്ഷേത്രത്തിലെ പ്രധാനപ്രതിഷ്ഠ. പെരിയാർ മണപ്പുറത്ത് ആഴ്ചകൾക്ക് മുന്നേ തുടങ്ങുന്ന ശിവരാത്രി ആഘോഷത്തിന് പങ്കെടുക്കാൻ പതിനായിരക്കണക്കിന് ജനങ്ങളാണ് വിവിധ ഭാഗങ്ങളിൽ നിന്നായി ഇവിടേക്ക് എത്താറുള്ളത്.
വൈക്കം മഹാദേവ ക്ഷേത്രം
കോട്ടയം ജില്ലയിൽ സ്ഥിതി ചെയ്യുന്ന വൈക്കം മഹാദേവ ക്ഷേത്രം അതി പുരാതനമായ ക്ഷേത്രങ്ങളിലൊന്നാണ്. വൈക്കത്തപ്പനാണ് ഇവിടുത്തെ പ്രതിഷ്ഠ. ത്രേതായുഗം മുതൽ ഭക്തർ ആരാധിച്ചു വരുന്ന ശിവലിംഗമാണ് ഇവിടെയുള്ളതെന്നാണ് വിശ്വസിച്ചു പോരുന്നത്. ഒറ്റത്തടിയിൽ തീർത്ത കവാടവും ഒറ്റക്കല്ലിൽ തീർത്ത ശ്രീകോവിലുമാണ് ക്ഷേത്രത്തിന്റെ പ്രത്യേകത. കാമ, ക്രോധ, മോഹ, ലോഭ, മത, മാത്സര്യ തുടങ്ങിയവ അകറ്റുന്ന ആറ് പടികൾ കടന്നാണ് ശിവ ഭഗവാനെ ഭക്തർ ദർശിക്കുന്നത്.
ഏറ്റുമാനൂർ മഹാദേവ ക്ഷേത്രം
കോട്ടയം ജില്ലയിൽ തന്നെയാണ് ഏറ്റുമാനൂർ ശിവ ക്ഷേത്രവും സ്ഥിതി ചെയ്യുന്നത്. ക്ഷേത്രോത്സവത്തിന്റെ ഭാഗമായി കുംഭ മാസത്തിൽ നടക്കുന്ന ഏഴരപ്പൊന്നാന ദർശനം പ്രശസ്തമാണ്. വർഷത്തിൽ ഒരിക്കൽ മാത്രം ആഘോഷപൂർവ്വമായി നടത്തുന്ന ചടങ്ങാണിത്. പത്ത് ദിവസം നീണ്ടു നിൽക്കുന്ന ഉത്സവമാണിത്. എട്ടാം നാളിലാണ് ഏഴരപ്പൊന്നാന ദർശനം നടക്കുന്നത്.
കടത്തുരുത്തി ശിവക്ഷേത്രം
കോട്ടയം ജില്ലയിലെ കടത്തുരുത്തി ഗ്രാമത്തിൽ സ്ഥിതി ചെയ്യുന്ന ഈ ശിവ ക്ഷേത്രം തളി ശിവക്ഷേത്രമെന്നും അറിയപ്പെടുന്നു. വൈക്കം, കടത്തുരുത്തി, ഏറ്റുമാനൂർ എന്നീ മൂന്ന് ക്ഷേത്രങ്ങളിൽ ഒരേ ദിവസം ദർശനം നടത്തുന്നത് പുണ്യമാണെന്ന് വിശ്വസിച്ചു പോരുന്നു. ഖരമർഹിയാൽ പ്രതിഷ്ഠിക്കപ്പെട്ട മൂന്ന് ശിവലിംഗങ്ങളിൽ രണ്ടാമത്തെ പ്രതിഷ്ഠ പ്രതിഷ്ഠിച്ചത് ഇവിടെയാണ്.
