മലയാള സിനിമയുടെ സുവർണകാലമാണിത്. തെന്നിന്ത്യൻ സിനിമാ ലോകത്ത് വൻ ചർച്ചയാകുകയാണ് മലയാളത്തിലെ ഓരോ സിനിമകളും. പ്രേമലു തെലുങ്കിൽ ഉടൻ തന്നെ റിലീസ് ചെയ്യുമെന്ന് സിനിമയുടെ അണിയറപ്രവർത്തകർ അറിയിച്ചിരുന്നു. പ്രേമലുവിന് ശേഷം മറ്റ് ഭാഷകളിൽ ചർച്ചയായി മാറിയ സിനിമ മഞ്ഞുമ്മൽ ബോയ്സ് ആയിരുന്നു. കേരളത്തിന് പുറമെ, തമിഴ്നാട്ടിലും ചിത്രത്തിന് വൻ സ്വീകാര്യത നേടിയിരുന്നു.
ഇപ്പോഴിതാ, ചിത്രം മറ്റൊരു ഭാഷയിൽ മൊഴിമാറ്റപ്പെടുമെന്ന വാർത്തയാണ് പുറത്ത് വരുന്നത്. മഞ്ഞുമ്മൽ ബോയ്സ് തെലുങ്കിലേക്കാണ് മൊഴിമാറ്റുന്നത്. ആന്ധ്ര, തെലങ്കാന സംസ്ഥാനങ്ങളില് ചിത്രം ഉടൻ റിലീസിനെത്തുമെന്നാണ് അണിയറപ്രവർത്തകർ അറിയിച്ചിരിക്കുന്നത്. ഇക്കാര്യം സംവിധായകൻ ചിദംബരം തന്നെയാണ് അറിയിച്ചത്. ഒരു തമിഴ് യുട്യൂബ് ചാനലിന് നല്കിയ അഭിമുഖത്തിലായിരുന്നു തെലുങ്കിലേക്ക് മൊഴിമാറ്റം ചെയ്യുന്ന കാര്യം വ്യക്തമാക്കിയത്. മാര്ച്ച് 15 ന് തെലുങ്ക് പതിപ്പ് തിയേറ്ററുകളിലെത്തും.
ചിത്രം ബോക്സോഫീസിൽ വൻ ഹിറ്റായി മുന്നേറുകയാണ്. ആഗോള ബോക്സോഫീസിൽ ഹിറ്റടിക്കുമ്പോൾ തമിഴിൽ ഇതുവരെ മറ്റൊരു മലയാള സിനിമയ്ക്കും ലഭിക്കാത്ത സ്വീകാര്യത മഞ്ഞുമ്മൽ ബോയ്സിനുണ്ട്. തമിഴ്നാട്ടിൽ ഏറ്റവും കൂടുതൽ ഷോകളും ടിക്കറ്റ് വില്പനയും നേടിയ മലയാള സിനിമയും മഞ്ഞുമ്മൽ ബോയ്സാണ്.
