അനന്ത് അംബാനി- രാധിക മെർച്ചന്റ് പ്രീവെഡ്ഡിംഗ് ആഘോഷങ്ങൾക്ക് പരിസമാപ്തി കുറിച്ചിരിക്കുകയാണ്. കഴിഞ്ഞ ദിവസം നടന്ന ഹസ്താക്ഷര ചടങ്ങോട് കൂടിയായിരുന്നു പരിപാടികൾ അവസാനിച്ചത്. മൂന്ന് ദിവസമായി നടക്കുന്ന ആഘോഷങ്ങൾ മാര്‍ച്ച് ഒന്നിനാണ് ആരംഭിച്ചത്. ഗുജറാത്തിലെ ജാംനഗറായിരുന്നു പ്രീവെഡ്ഡിംഗ് ആഘോഷത്തിന്റെ വേദി.
പ്രീവെഡ്ഡിംഗുമായി ബന്ധപ്പെട്ട നിരവധി ചിത്രങ്ങളും വീഡിയോകളുമാണ് സമൂഹമാദ്ധ്യമങ്ങളിൽ ശ്രദ്ധേയമാകുന്നത്. ആഘോഷത്തിന്റെ ആദ്യ ദിനത്തില്‍ രാധിക അനന്തിനോടുള്ള സ്‌നേഹത്തെ കുറിച്ച് സംസാരിച്ചതായിരുന്നു ഏറെ വൈറലായത്. അനന്ത് അംബാനിയോടുള്ള പ്രണയത്തെക്കുറിച്ചും അംബാനി കുടുംബം നൽകുന്ന സ്നേഹത്തെക്കുറിച്ചുമായിരുന്നു രാധിക മെർച്ചന്റ് വാചാലയായത്.
ബാല്യകാല സുഹൃത്തുക്കളായിരുന്ന തങ്ങൾ ഏഴ് വർഷം മുമ്പാണ് പ്രണയം ആരംഭിച്ചതെന്നാണ് രാധിക പറയുന്നത്. ജീവിതത്തിലെ മനോഹര കാര്യങ്ങളെല്ലാം സംഭവിച്ചത് ജാംനഗറിലാണെന്നും പ്രീവെഡ്ഡിംഗ് ഇവിടെ ആഘോഷിക്കാൻ സാധിച്ചതിൽ ആഹ്ലാദവതിയാണെന്നും രാധിക പറയുന്നുണ്ട്. അനന്തും താനും വളരെ ഭാഗ്യവാന്മാരാണ്, ഭൂമിയിൽ ഏറ്റവും അത്ഭുതപ്പെടുത്തിയ സ്ത്രീകൾ തങ്ങൾക്കൊപ്പമുണ്ടെന്നും രാധിക മെർച്ചന്റ് പറഞ്ഞു. നിത അംബാനിയെയും, ഇഷ അംബാനിയെയും തന്റെ അമ്മയെയും സഹോദരി അഞ്ജലിയെയും കുറിച്ചായിരുന്നു രാധിക സംസാരിച്ചത്.
അനന്തിന്റയും തന്റെയും ഹൃദയം എപ്പോഴും ജാം നഗറിൽ ആണെന്നും രാധിക വാചാലയായി. തങ്ങൾ വളർന്നതും സുഹൃത്തുക്കളായതും പ്രണയത്തിലായതുമെല്ലാം ജാംനഗറിൽ ആയിരുന്നു. ഒരുമിച്ചൊരു ജീവിതം ആരംഭിക്കുന്നതിന് തുടക്കം കുറിക്കാനും ജാം നഗർ സാക്ഷിയായെന്നും രാധിക മെർച്ചന്റ് കൂട്ടിച്ചേർത്തു.
