എറണാകുളം: ഇന്ത്യൻ നാവികസേനയ്ക്ക് പ്രതിരോധ കവചം തീർക്കാൻ ഇനി എംഎച്ച് 60 റോമിയോ ഹെലികോപ്റ്ററുകളും. രാജ്യത്തെ ആദ്യ എംഎച്ച് 60 സ്ക്വാഡ്രൻ ഹെലികോപ്പ്റ്ററുകൾ കൊച്ചിയിലെ ഐഎൻഎസ് ഗരുഡയിൽ കമ്മീഷൻ ചെയ്തു. നാവികസേനാ ആസ്ഥാനത്ത് നടന്ന ചടങ്ങിൽ കേന്ദ്ര പ്രതിരോധമന്ത്രി രാജ്നാഥ് സിംഗാണ് കമ്മീഷൻ ചെയ്തത്. അമേരിക്കൻ നിർമ്മിത സീ ഹോക്ക് ഹെലികോപ്റ്ററുകളുടെ ആദ്യ സ്ക്വാഡ്രൻ ദക്ഷിണ നാവിക കമാൻഡിന് കീഴിലാണ് വിന്യസിക്കുന്നത്. ആറ് ഹെലികോപ്റ്ററുകളാണ് ഒരു സ്ക്വാഡ്രനിൽ ഉൾപ്പെടുന്നത്.
അമേരിക്കയിൽ നിന്ന് ഇന്ത്യ വാങ്ങുന്ന 24 ഹെലികോപ്റ്ററുകളിൽ ഇതിനോടകം തന്നെ രാജ്യത്ത് എത്തിച്ച ആറെണ്ണമാണ് ആദ്യഘട്ടത്തിൽ നാവികസേനയ്ക്ക് ലഭിച്ചത്.
ചൈനീസ് അന്തർവാഹിനികളുടെ നിരീക്ഷണം പ്രതിരോധിക്കുക എന്നതാണ് ഇതിലൂടെ ലക്ഷ്യമിടുന്നത്. സമുദ്രോപരിതല യുദ്ധത്തിനും, തിരച്ചിൽ, രക്ഷാദൗത്യങ്ങൾ, മെഡിക്കൽ ഇവാക്വേഷൻ എന്നിവയ്ക്കെല്ലാം എം.എച്ച് 60 ആർ ഹെലികോപ്റ്ററുകൾ ഒരുപോലെ ഉപയോഗിക്കാനാകും.
യുഎസ് നിർമ്മിതമാണെങ്കിലും ഇന്ത്യ തദ്ദേശീയമായി നിർമ്മിച്ച ഒട്ടേറെ ആയുധങ്ങളും ഉപകരണങ്ങളും എം.എച്ച് 60 ആർ ഹെലികോപ്റ്ററിലുണ്ട്.
