യഥാർത്ഥ സംഭവത്തെ പ്രേക്ഷകരുടെ മുന്നിലെത്തിക്കുന്ന ദിലീപ് ചിത്രം തങ്കമണി ഇന്ന് തിയേറ്ററുകളിലെത്തും. കേരള മനസാക്ഷിയെ നടുക്കിയ ഇടുക്കിയിലെ തങ്കമണി എന്ന സ്ഥലത്ത് നടന്ന സംഭവത്തെ ആസ്പദമാക്കിയൊരുങ്ങുന്ന ചിത്രമാണ് തങ്കമണി. സൂപ്പർ ഗുഡ് ഫിലിംസിന്റെ ബാനറിൽ ആർബി ചൗധരി, ഇഫാർ മീഡിയയുടെ ബാനറിൽ റാഫി മതിര എന്നിവർ ചേർന്ന് നിർമ്മിച്ച് രതീഷ് രഘുനന്ദൻ സംവിധാനം ചെയ്ത ദിലീപിന്റെ 148-ാമത്തെ ചിത്രമാണിത്.
നീത പിളള, പ്രണിത സുഭാഷ് എന്നിവരാണ് ദിലീപിന്റെ നായികമാരായി എത്തുന്നത്. ബിഗ് ബജറ്റില് ഒരുങ്ങുന്ന സിനിമയിൽ മലയാളത്തിലേയും തമിഴിലേയും വന് താരനിര തന്നെ അണിനിരക്കുന്നു. കട്ടപ്പനയിലാണ് സിനിമയുടെ ചിത്രീകരണം പ്രധാനമായും നടന്നത്. ‘ഉടൽ’ എന്ന ചിത്രത്തിന് ശേഷം രതീഷ് രഘുനന്ദൻ സംവിധാനം ചെയ്ത ചിത്രമാണിത്.
തങ്കമണി എന്ന ഗ്രാമത്തിൽ ഒരു ബസ് സർവ്വീസുമായി ബന്ധപ്പെട്ടുണ്ടാകുന്ന തർക്കവും, തുടർന്ന് പോലീസ് ലാത്തിച്ചാർജും വെടിവയ്പ്പും ഉണ്ടായതിനെ കുറിച്ചുമാണ് ചിത്രത്തിൽ പറയുന്നത്. ഇതിന്റെ ഒരു പൂർണരൂപമാണ് പ്രേക്ഷകർ ഇന്ന് തിയേറ്ററുകളിൽ കാണുക. കേരളത്തിന് പുറമേ കർണാടക, തമിഴ്നാട്, തെലങ്കാന എന്നിവിടങ്ങളിലും ചിത്രം പ്രദർശിപ്പിക്കും.
