നിരവധി ആരാധകരുള്ള താരദമ്പതികളാണ് ഇന്ദ്രജിത്തും പൂർണിമയും. ഇരുവരും സിനിമയിലും ഭാര്യാ ഭർത്താക്കന്മാരായി
അഭിനയിക്കാൻ പോകുകയാണെന്ന വിവരമാണ് പുറത്ത് വരുന്നത്. ‘ഒരു കട്ടിൽ ഒരു മുറി’ സിനിമയുടെ കൺസപ്റ്റ് പോസ്റ്റർ പുറത്ത് വന്നതോടെയാണ് സമൂഹമാദ്ധ്യമങ്ങളിൽ ഇത്തരത്തിലൊരു വാർത്ത ചർച്ചയായത്.
‘കിസ്മത്ത്’, ‘തൊട്ടപ്പൻ’ എന്നീ സിനിമകൾക്ക് ശേഷം ഷാനവാസ് കെ ബാവക്കുട്ടി ഒരുക്കുന്ന സിനിമയാണ് ‘ഒരു കട്ടിൽ ഒരു മുറി’. ഈ സിനിമയുടെ കൺസപ്റ്റ് പോസ്റ്ററിലാണ് ഭിത്തിയിലെ ഇരുവരുടെയും യഥാർത്ഥ വിവാഹ ഫോട്ടോ കാണാൻ കഴിയുന്നത്. ഒരു കിടപ്പുമുറിയിലെ ദൃശ്യമാണ് പോസ്റ്ററിലുള്ളത്. കൂടാതെ, കട്ടിലും മേശയും ബെഡ് ലാമ്പും ടേപ്പ് റെക്കോർഡറും പോസ്റ്ററിലുണ്ട്.
രഘുനാഥ് പലേരിയുടെ തിരക്കഥയിൽ ഒരുങ്ങുന്ന സിനിമയുടെ ഒഫീഷ്യൽ ഫസ്റ്റ് ലുക്ക് മുമ്പ് പുറത്തിറങ്ങിയിരുന്നു. ഹക്കിം ഷാ, പ്രിയംവദ കൃഷ്ണൻ, പൂർണിമ ഇന്ദ്രജിത്ത് എന്നിവരാണ് ചിത്രത്തിൽ പ്രധാന വേഷത്തിലെത്തുന്നത്. ഷമ്മി തിലകൻ, വിജയരാഘവൻ , ജാഫർ ഇടുക്കി, രഘുനാഥ് പലേരി , ജനാർദ്ദനൻ, ഗണപതി, സ്വതിദാസ് പ്രഭു, മനോഹരി ജോയ്, തുഷാര പിള്ള, വിജയകുമാർ പ്രഭാകരൻ, ഹരിശങ്കർ, രാജീവ് വി തോമസ്, ജിബിൻ ഗോപിനാഥ്, ഉണ്ണിരാജ, ദേവരാജൻ കോഴിക്കോട് തുടങ്ങിയവർ ചിത്രത്തിൽ മറ്റ് കഥാപാത്രങ്ങളായെത്തുന്നുണ്ട്.
