കൊച്ചി: നിരവധി ആരാധകരുള്ള ഒരു സോഷ്യൽ മീഡിയ കണ്ടന്റ് ക്രിയേറ്ററാണ് ഗ്രീഷ്മ ബോസ്സ്. വീട്ടുകാർക്കൊപ്പവും സുഹൃത്തുക്കൾക്കൊപ്പവുമുള്ള രസകരമായ വീഡിയോകളാണ് ഗ്രീഷ്മ സമൂഹമാദ്ധ്യമങ്ങളിൽ പങ്കുവക്കാറുള്ളത്. നിരവധി ആരാധകരുള്ള ഗ്രീഷ്മ സോഷ്യൽ മീഡിയയിൽ പങ്കുവച്ച ഒരു വീഡിയോ ശ്രദ്ധ നേടുകയാണ്.
ഗ്രീഷ്മയുടെ വീഡിയോയ്ക്ക് ചുവടെ സോഷ്യൽ മീഡിയ താരമായ അമല ഷാജിയുടെ അമ്മ ബീന ഒരു മോശം കമന്റിട്ടിരുന്നു. വളരെ മോശമായ ഭാഷയിലായിരുന്നു ബീന ഷാജിയുടെ കമന്റ്. ഇത് ശ്രദ്ധയിൽപ്പെട്ടതോടെ ഗ്രീഷ്മ ഇൻസ്റ്റഗ്രാം സ്റ്റോറിയായി മറുപടിയും നൽകിയിരുന്നു. ‘നാല് മില്യണിലധികം ഫോളോവേഴ്സുള്ള ക്രിയേറ്ററിന്റെ അമ്മയല്ലേ… ഇത്തിരി ബോധമാകാം ആന്റി’ എന്നായിരുന്നു ഗ്രീഷ്മ മറുപടിയായി കുറിച്ചത്. ഒപ്പം അമല അടക്കമുള്ളവരെ ടാഗും ചെയ്തു. ഇതോടെ ബീന കമന്റ് ഡിലീറ്റ് ചെയ്തു. പിന്നാലെയാണ് ഇക്കാര്യത്തിൽ പ്രതികരണവുമായി ഗ്രീഷ്മ രംഗത്തെത്തിയത്.
‘ ചെറുപ്പം മുതലേ ഞാൻ ബോഡി ഷെയ്മിംഗ് നേരിട്ടിരുന്നു. അന്നൊന്നും ഇത്തരത്തിൽ എനിക്ക് പ്രതികരിക്കാൻ കഴിഞ്ഞിരുന്നില്ല. ഇപ്പോൾ എന്നെ എന്ത് പറഞ്ഞാലും പ്രതികരിക്കാനുള്ള കഴിവ് എനിക്കുണ്ട്. എന്നാൽ ഇപ്പോഴും പ്രതികരിക്കാൻ ധൈര്യമില്ലാത്ത നിരവധി കുട്ടികളുണ്ട്. ബോഡി ഷെയ്മിംഗ് ഒരാളെ എത്രമാത്രം വിഷമിപ്പിക്കുമെന്ന് എനിക്ക് വ്യക്തമായി അറിയാം. അതുകൊണ്ടുതന്നെ പരമാവധി ബോഡി ഷെയ്മിംഗ് ഒഴിവാക്കൂവെന്നും ഗ്രീഷ്മ പറഞ്ഞു.
