ഒരു കാർ തിരഞ്ഞെടുക്കാനോ നിർദേശിക്കാനോ പറയുമ്പോൾ വാഹനപ്രേമികളിൽ ബഹുഭൂരിപക്ഷവും പറയുന്നത് ടൊയോട്ട ഫോർച്യൂണർ തന്നെയായിരിക്കും. എന്നാൽ മുമ്പ് ഫോർച്യൂണറിന്റെ പ്രധാന എതിരാളിയായിരുന്ന ഐക്കോണിക്ക് അമേരിക്കൻ ബ്രാൻഡായ ഫോർഡിന്റെ എൻഡേവറിനെയും വാഹനപ്രേമികൾക്ക് അത്രപ്പെട്ടന്നൊന്നും മറക്കാൻ സാധിക്കില്ല. 2021ലാണ് ഇന്ത്യൻ വിപണികളോട് വിടപറഞ്ഞ് ഫോർഡ് ഇന്ത്യയിലെ പ്രവർത്തനങ്ങൾ അവസാനിപ്പിച്ചത്. രണ്ട് വർഷങ്ങൾക്ക് മുമ്പ് ഫോർഡിന്റെ ആ തീരുമാനം വാഹനപ്രേമികളെ നിരാശപ്പെടുത്തിയെങ്കിലും ഇപ്പോഴിതാ ആ നിരാശയകറ്റാൻ ഫോർഡ് വീണ്ടും വിപണിയിലേക്ക് എത്തുന്നുവെന്നാണ് പുറത്തുവരുന്ന റിപ്പോർട്ടുകൾ.
ഫോർഡ് ഇന്ത്യയിലേക്ക് മടങ്ങിയെത്തുമ്പോൾ അവരുടെ ഭീമനായ എൻഡേവറിനെ പുത്തൻ രൂപത്തിൽ അവതരിപ്പിച്ചേക്കും. എൻഡേവറിന്റെ സ്പൈ ചിത്രങ്ങളും ഇന്റർനെറ്റിൽ തരംഗമായിരുന്നു. എൻഡേവർ തിരിച്ചു വരികയാണെങ്കിൽ 2025ഓടെ വമ്പൻ മാറ്റങ്ങളുമായിട്ടായിരിക്കും മടങ്ങിയെത്തുക. എൻഡേവറിന്റെ വിൽപന നിർത്തി വച്ചതിന് ശേഷം 2022ലാണ് ന്യൂ ജനറേഷൻ എവറസ്റ്റ് ആഗോള വിപണികളിലെത്തുന്നത്. ഓസ്ട്രേലിയ, തെക്ക് കിഴക്കൻ ഏഷ്യ തുടങ്ങിയ ആഗോള വിപണികളിലായിരുന്നു ഈ കാറുകൾ വിറ്റഴിച്ചിരുന്നത്. ഫോർഡ് എൻഡവർ ഇന്ത്യയിലെത്തുമ്പോൾ പുതിയ പ്ലാറ്റ് ഫോമിൽ, മികച്ച ഫീച്ചറുകളോടെയായിരിക്കും എൻഡേവറിന്റെ ഇന്ത്യയിലെ വരവ്.
