ന്യൂഡൽഹി: സംരംഭങ്ങളുടെ വളർച്ചയ്ക്കും മേഖലയിലെ നിക്ഷേപം ശക്തിപ്പെടുത്തുന്നതിനുമായി ത്രിദിന പരിപാടിയായ ‘സ്റ്റാർട്ടപ്പ് മഹാകുഭ്’ പരിപാടിയുടെ സമാപന സമ്മേളനം ഇന്ന്. ഡൽഹിയിലെ ഭാരത് മണ്ഡപത്തിൽ നടക്കുന്ന പരിപാടിയുടെ ഉദ്ഘാടനം പ്രധാനമന്ത്രി നരേന്ദ്ര മോദി നിർവഹിക്കും.
വാണിജ്യ മന്ത്രാലയവും ബൂട്ട്സ്ട്രാപ്പ് ഇൻക്യുബേഷൻ & അഡ്വൈസറി ഫൗണ്ടേഷൻ, ഇന്ത്യൻ വെഞ്ച്വർ ആൻഡ് ആൾട്ടർനേറ്റ് ക്യാപിറ്റൽ അസോസിയേഷൻ (IVCA) എന്നിവയുൾപ്പെടെ പ്രമുഖ വ്യവസായ അസോസിയേഷനുകൾ സംയുക്തമായാണ് സ്റ്റാർട്ടപ്പ് മഹാകുഭ് സംഘടിപ്പിച്ചത്. ഇന്ത്യയിലെ ഏറ്റവും വലയി സ്റ്റാർട്ടപ്പ് ഇവന്റാണ് ഇത്. വളർന്നു വരുന്ന നൂതന സാങ്കേതിക വിദ്യകളായ ഡീപ്ടെക്, അഗ്രിടെക്, ബയോടെക്, മെഡ്ടെക്, എഐ, ഗെയിമിംഗ് തുടങ്ങിയ മേഖലകളിലെ വളർച്ചയെ പ്രോത്സാഹിപ്പിക്കുന്നതിൽ പരിപാടി സുപ്രധാന പങ്ക് വഹിക്കുമെന്ന് മന്ത്രാലയം അറിയിച്ചു.
അഭൂതപൂർവ്വമായ പങ്കാളിത്തത്തിനാണ് രാജ്യത്തെ സംരംഭകരെ ശക്തിപ്പെടുത്തുന്നതിനായി ലക്ഷ്യമിട്ടുള്ള പരിപാടി സാക്ഷ്യം വഹിച്ചത്. 2,000-ത്തിലധികം സ്റ്റാർട്ടപ്പുകൾ, ആയിരത്തിലധികം നിക്ഷേപകർ, നൂറിലധികം യൂണികോണുകൾ, 3,000-ത്തിലധികം കോൺഫറൻസ് പ്രതിനിധികൾ, പത്തോളം രാജ്യങ്ങളിലെ പ്രതിനിധികൾ, 30000-ത്തിലേറെ സംരംഭകർ തുടങ്ങി നിരവധി പ്രമുഖരാണ് പരിപാടിയുടെ ഭാഗമായത്. ഭാരതത്തിന്റെ സാമ്പത്തിക പുരോഗതിയിലും വികസനത്തിലും സംരംഭങ്ങൾക്കുള്ള പങ്ക് വളരെ വലുതാണെന്ന് വ്യവസായ പ്രമുഖരും നയരൂപീകരണ നിർമ്മാതാക്കളും വ്യക്തമാക്കി. വിവിധ മേഖലയിൽ നിന്നുള്ള വിദഗ്ധർ ഇന്ത്യൻ സ്റ്റാർട്ടപ്പുകളുടെ ഭാവിയെ കുറിച്ചും രാജ്യത്തിന്റെ സമ്പദ് വ്യവസ്ഥയ്ക്ക് എപ്പരകാരം സംഭാവനകൾ നൽകാമെന്നും ചർച്ച ചെയ്തു.
