ജപ്പാനിലുണ്ടായ ഭൂചലനത്തിൽ അകപ്പെട്ട് പ്രശസ്ത സംവിധായകൻ എസ് എസ് രാജമൗലിയും കുടുംബവും. കഴിഞ്ഞ ദിവസമായിരുന്നു രാജമൗലിയും ഭാര്യ രമാ മൗലിയും ജപ്പാനിൽ എത്തിയത്. ആർആർആർ എന്ന ചിത്രത്തിന്റെ ജപ്പാനിൽ നടക്കുന്ന പ്രത്യേക പ്രദർശനത്തിൽ പങ്കെടുക്കാനായാണ് അദ്ദേഹം കുടുംബസമേതം ഇവിടെയെത്തിയത്. തങ്ങൾക്ക് നേരിടേണ്ടിവന്ന ദുരവസ്ഥയെ പറ്റിയുള്ള കുറിപ്പ് മകൻ എസ് എസ് കാർത്തികേയയാണ് സമൂഹമാദ്ധ്യമങ്ങളിലൂടെ പങ്കുവച്ചത്.
ഇപ്പോൾ ജപ്പാനിൽ ഒരു ഭയാനകമായ ഭൂകമ്പമുണ്ടായി. ഞങ്ങൾ 28-ാമത്തെ നിലയിലായിരുന്നു, നിലം മെല്ലെ മെല്ലെ ചലിക്കുവാൻ തുടങ്ങി. ഭൂകമ്പമാണെന്ന് മനസ്സിലാക്കാൻ ഞങ്ങൾക്ക് കുറച്ച് സമയമെടുത്തു. എല്ലാവരും പരിഭ്രാന്തിയിലായി. എന്നാൽ ചുറ്റുമുണ്ടായിരുന്ന ജപ്പാൻകാർക്ക് മഴ പെയ്യാൻ തുടങ്ങിയതു പോലെ യാതൊരിളക്കവും ഉണ്ടായിരുന്നില്ല. ജപ്പാൻ കാലാവസ്ഥാ ഏജൻസിയിൽ നിന്നും ഭൂകമ്പത്തെക്കുറിച്ച് അടിയന്തര മുന്നറിയിപ്പ് കാണിക്കുന്ന തന്റെ വാച്ചിന്റെ ഫോട്ടോയും അദ്ദേഹം സമൂഹമാദ്ധ്യമങ്ങളിൽ പങ്കുവച്ചു.
