ആകാശവിസ്മയക്കാഴ്ചകൾ എന്നും മനുഷ്യനെ അത്ഭുതപ്പെടുത്തുന്നവയാണ്. ജ്വലിച്ചു നിൽക്കുന്ന സൂര്യനും നിലാവ് പരത്തി മാഞ്ഞുമറയുന്ന ചന്ദ്രനും മിന്നിത്തിളങ്ങുന്ന നക്ഷത്രക്കൂട്ടങ്ങളും, തുടങ്ങി നമ്മുടെ കണ്ണുകൾക്ക് കാണാൻ സാധിക്കുന്ന ആകാശക്കാഴ്ചകൾ പലതാണ്. എന്നാൽ ഇതിനപ്പുറത്തേക്കുള്ള ബഹിരാകാശ കാഴ്ചകൾ വളരെ വ്യത്യസ്തമാണെന്ന് നമുക്ക് അറിയാം. അവിടെ നടക്കുന്ന സംഭവവികാസങ്ങളും പലതാണ്.
ചെറിയ ഗാലക്സികൾ കൂടിച്ചേർന്നാണ് ക്ഷീരപഥം ഉണ്ടാവുന്നതെന്ന് നാം കേട്ടിരിക്കും. അത്തരത്തിലുണ്ടായ 13 ബില്യൺ വർഷങ്ങൾക്ക് മുമ്പുള്ള ക്ഷീരപഥത്തിലെ നക്ഷത്ര കൂട്ടങ്ങൾക്ക് (ബിൽഡിംഗ് ബ്ലോക്കുകൾ) പേരിട്ടിരിക്കുകയാണ് ജർമനിയിലെ ഗവേഷക സമൂഹം.
കണ്ടെത്തിയ നക്ഷത്ര സമൂഹത്തിന് ‘ശിവ’ എന്നും ‘ ശക്തി’ എന്നുമാണ് ജർമ്മനിയിലെ ഗവേഷകർ പേരിട്ടിരിക്കുന്നത്. ജർമനിയിലെ മാക്സ് പ്ലാങ്ക് ഇൻസ്റ്റിറ്റ്യൂട്ട് ഫോർ ആസ്ട്രോണമിയാണ് പഠനം നടത്തിയത്. ആസ്ട്രോഫിസിക്കൽ ജേണലിലാണ് ഇത് സംബന്ധിച്ച വിവരങ്ങൾ പ്രസിദ്ധീകരിച്ചിരിക്കുന്നത്.
ചെറിയ ഗാലക്സികൾ കൂട്ടിയിടിച്ച് നിരവധി കണികകൾ തെറിച്ചു പേവുകയും ഇത് പിന്നീട് കൂടിച്ചേർന്ന് വ്യത്യസ്ത താരപഥങ്ങളായി മാറി. ഇങ്ങനെയുണ്ടായ രണ്ട് താര സമൂഹത്തിനാണ് ശിവ എന്നും ശക്തിയെന്നും ജർമനിയിലെ ശാസ്ത്രജ്ഞർ പേര് നൽകിയിരിക്കുന്നത്. യൂറോപ്യൻ ബഹിരാകാശ ഏജൻസിയുടെ ഗയ്യ ഉപഗ്രഹത്തിൽനിന്നുള്ള വിവരങ്ങളും യുഎസ് സ്ലോൻ ഡിജിറ്റൽ സ്കൈ സർവേയിൽ നിന്നുള്ള വിലയിരുത്തലുകളും പരിശോധിച്ചാണ് ഗവേഷണം നടത്തിയിരിക്കുന്നത്.
സ്പൈറൽ രൂപത്തിലുള്ള ക്ഷീരപഥത്തിന്റെ ഹസ്തഘടനയിലുള്ള നക്ഷത്രങ്ങളെക്കാൾ പഴക്കം ചെന്നതാണ് ഇപ്പോൾ കണ്ടെത്തിയിരിക്കുന്ന നക്ഷത്രക്കൂട്ടം. ഹിന്ദുമതപ്രകാരം പ്രപഞ്ചത്തെ താങ്ങി നിർത്തുന്നത് ശിവനും ശക്തിയുമാണെന്നാണ് വിശ്വാസം. അതിനാലാണ് താരസമൂഹങ്ങൾക്ക് ശിവ എന്നും ശക്തിയെന്നും പേര് നൽകിയതെന്ന് പഠനത്തിന് നേതൃത്വം നൽകിയ ക്യാത്തി മഹൻ പറഞ്ഞു.