പ്രശസ്ത നടി സുരഭി സന്തോഷ് വിവാഹിതയായി. പയ്യന്നൂർ സ്വദേശിയും സരിഗമ ലേബലിലെ ഗായകനുമായ പ്രണവ് ചന്ദ്രനാണ് വരൻ. കോവളത്ത് ലളിതമായ ചടങ്ങുകളോടെയായിരുന്നു വിവാഹം. വിവാഹത്തിന്റെ ചിത്രങ്ങൾ താരം തന്നെയാണ് ഇൻസ്റ്റഗ്രാമിൽ പങ്കുവച്ചത്.
കുഞ്ചാക്കോ ബോബൻ നായകനായി എത്തിയ ‘കുട്ടനാടൻ മാർപ്പാപ്പ’ എന്ന ചിത്രത്തിലൂടെയായിരുന്നു സുരഭി മലയാള സിനിമാ ലോകത്തെത്തിയത്. പിന്നീട് ഹാപ്പി സർദാർ, മൈ ഗ്രേറ്റ്ഗ്രാന്റ് ഫാദർ, പദ്മ തുടങ്ങി നിരവധി ചിത്രങ്ങളിൽ അവർ വേഷമിട്ടു. മലയാള സിനിമയിലേക്കെത്തുന്നതിന് മുമ്പ് കന്നട സിനിമകളിലും സുരഭി പ്രധാന വേഷങ്ങൾ കൈകാര്യം ചെയ്തിട്ടുണ്ട്.
നവംബറിലായിരുന്നു ഇവരുടെ വിവാഹനിശ്ചയം. വീട്ടുകാർ ആലോചിച്ചാണ് വിവാഹം നടത്തിയത്. മോഡലും അഭിഭാഷകയും ക്ലാസിക്കൽ ഡാൻസറുമാണ് സുരഭി സന്തോഷ്. ആപ് കൈസാ ഹോ എന്ന ചിത്രത്തിൽ ധ്യാൻ ശ്രീനിവാസനൊപ്പമാണ് സുരഭി ഒടുവിൽ അഭിനയിച്ചത്.
