മണിരത്നവും കമൽഹാസനും വീണ്ടും ഒരുമിക്കുന്ന ചിത്രമാണ് തഗ് ലൈഫ്. വൻ താരനിര തന്നെ അണിനിരക്കുന്ന സിനിമയുടെ ചിത്രീകരണം പുരോഗമിക്കുകയാണ്. അടുത്തിടെയാണ് സിനിമയിൽ നിന്ന് ദുൽഖർ പിന്മാറിയെന്നും പകരം ചിമ്പു ആയിരിക്കും അഭിനയിക്കുക എന്നും വാർത്തകൾ പുറത്തുവന്നത്. എന്നാൽ ഈ വാർത്തയിൽ ഔദ്യോഗിക സ്ഥിരീകരണങ്ങൾ ഉണ്ടായിരുന്നില്ല.
സിനിമയുടെ ചിത്രീകരണത്തിനായി ചിമ്പു ജോയിൻ ചെയ്തെന്ന വിവരമാണ് പുറത്തുവരുന്നത്. ജൂണിൽ ചിത്രീകരണം ആരംഭിക്കുന്ന എസ്ടിആർ 48 ആണ് ചിമ്പുവിന്റെ ഏറ്റവും പുതിയ ചിത്രം. ഈ സിനിമയുടെ ഷൂട്ടിംഗ് ആരംഭിക്കുന്നതിന് മുമ്പായി തഗ് ലൈഫിലെ തന്റെ രംഗങ്ങൾ പൂർത്തിയാക്കാനാണ് താരം ലക്ഷ്യമിടുന്നതെന്നും വാർത്തകളുണ്ട്. ചിത്രീകരണ വേളയിൽ കമലഹാസനൊപ്പമുള്ള ചിമ്പുവിന്റെ ചിത്രങ്ങൾ സോഷ്യൽ മീഡിയയിൽ വൈറലാവുകയാണ്.
ജയം രവി, തൃഷ, ഗൗതം കാർത്തിക്, ഐശ്വര്യ ലക്ഷ്മി, ജോജു ജോർജ് എന്നിവരും ചിത്രത്തിൽ പ്രധാന വേഷത്തിൽ എത്തും. നായകൻ എന്ന ചിത്രത്തിന് ശേഷം കമലഹാസനും മണിരത്നവും വീണ്ടും ഒരുമിക്കുന്നു എന്ന പ്രത്യേകതയും ചിത്രത്തിനുണ്ട്. രാജ്കമൽ ഫിലിംസ് ഇന്റർനാഷണൽ, മദ്രാസ് ടാക്കീസ്, റെഡ് ജയന്റ് മൂവീസ്, ആർ.മഹേന്ദ്രൻ, ശിവ അനന്ത് എന്നിവർ ചേർന്നാണ് ചിത്രത്തിന്റെ നിർമ്മാണം.
മണിരത്നത്തിനൊപ്പം സംഗീതസംവിധായകൻ എ.ആർ റഹ്മാനും എഡിറ്റർ ശ്രീകർ പ്രസാദും വീണ്ടും ഒന്നിക്കുന്നെന്ന പ്രത്യേകതയും ചിത്രത്തിനുണ്ട്. അതേസമയം ഒന്നിലധികം സിനിമകളുടെ ചിത്രീകരണം നടക്കുന്നതിനാലാണ് ദുൽഖർ ചിത്രത്തിൽ നിന്ന് പിന്മാറിയതെന്നാണ് വിവരം. തഗ് ലൈഫിൽ ജില്ലാ കളക്ടറുടെ വേഷത്തിലാണ് ദുൽഖർ സൽമാൻ അഭിനയിക്കേണ്ടിയിരുന്നത്.
