തിരിച്ചുവരവിൽ ഐപിഎല്ലിൽ മറ്റൊരു നാഴികക്കല്ല് പിന്നിടാനൊരുങ്ങി ക്യാപ്റ്റൻ ഋഷഭ് പന്ത്. ഡൽഹി ക്യാപിറ്റൽസിനായി 100-ാം മത്സരം കളിക്കാനൊരുങ്ങുകയാണ് താരം. രാജസ്ഥാൻ റോയൽസിനെതിരെയാണ് പന്തിന്റെ നൂറാം അങ്കം. 2016-ൽ ഡൽഹിക്കായി അരങ്ങേറിയ പന്ത്, ഫ്രാഞ്ചെസിക്ക് വേണ്ടി 100-ാം മത്സരം കളിക്കുന്ന ആദ്യ താരവുമാണ്.
ഡിസിക്കായി ഇതുവരെ 99 മത്സരങ്ങളിൽ നിന്ന് 34.40 ശരാശരിയിൽ 2,856 റൺസാണ് താരം നേടിയത്. ഇതിൽ ഒരു സെഞ്ച്വറിയും 15 അർദ്ധ സെഞ്ച്വറിയും ഉൾപ്പെടുന്നു. 128* ആണ് മികച്ച സ്കോർ. 262 ഫോറുകളും 129 സിക്സുകളും പന്ത് ഇതുവരെ ഐപിഎല്ലിൽ അതിർത്തിവര കടത്തി. 62 ക്യാച്ചും 19 സ്റ്റംപിഗുകളും താരത്തിന്റെ അക്കൗണ്ടിലുണ്ട്. ഐപിഎല്ലിൽ ഡൽഹി താരം നേടുന്ന ഏറ്റവും ഉയർന്ന വ്യക്തിഗത സ്കോറിന് (128*) ഉടമയും പന്താണ്.
2021-ലാണ് പന്ത് ഡൽഹിയുടെ നായകനായത്. താരത്തിന് കീഴിൽ ഡിസി 16 മത്സരങ്ങൾ ജയിച്ചപ്പോൾ 14 എണ്ണത്തിൽ പരാജയപ്പെട്ടു. 2020-ൽ ഡൽഹിയെ ഫൈനലിലേക്ക് നയിച്ചതും പന്തായിരുന്നു. എന്നാൽ ആ വർഷം മുംബൈയോട് തോറ്റു. 2022 ഡിസംബറിൽ വാഹനപകടത്തിൽ ഗുരുതര പരിക്കേറ്റ താരം ഐപിഎല്ലിൽ പഞ്ചാബ് കിംഗ്സിനെതിരായ മത്സരത്തിലൂടെയാണ് ക്രിക്കറ്റിലേക്ക് തിരിച്ചു വന്നത്. ഇന്ന് രാജസ്ഥാനെതിരെ ജയത്തിൽ കുറഞ്ഞതൊന്നും ഡൽഹി ആഗ്രഹിക്കുന്നില്ല.