ചെന്നൈ: ആൽവാർപേട്ടയിലെ ബാറിന്റെ മേൽക്കൂര തകർന്ന് വീണ് മൂന്ന് മരണം. ചാമിയേഴ്സ് റോഡിലെ സെഖ്മെറ്റ് ബാറിന്റെ ഒന്നാം നിലയുടെ മേൽക്കൂരയാണ് തകർന്ന് വീണത്. ബാറിന്റെ പ്രവർത്തന സമയത്തായിരുന്നു അപകടം. ഐപിഎല്ലിന്റെ സ്ക്രീനിംഗ് നടക്കുന്നതിനാൽ നിരവധി പേരാണ് കെട്ടിടത്തിലുണ്ടായിരുന്നത്. അവശിഷ്ടങ്ങൾക്കിടയിൽ കുടുങ്ങിയവരെ പുറത്തെത്തിച്ചതായി അധികൃതർ അറിയിച്ചു.
ബാറിനോട് ചേർന്ന് മെട്രോയുടെ നിർമ്മാണ പ്രവൃത്തി നടക്കുന്നുണ്ടായിരുന്നു. ഇതാണ് അപകടത്തിന് കാരണമെന്നാണ് റിപ്പോർട്ട്. മരിച്ചവർ തൊഴിലാളികളാണെന്നാണ് വിവരം. അപകടത്തിലേക്ക് നയിക്കുന്ന വിധം മെട്രോയുടെ നിർമ്മാണ പ്രവർത്തനം നടന്നിരുന്നോ എന്ന് പരിശോധിച്ച് വരികയാണെന്ന് അസിസ്റ്റന്റ് പൊലീസ് കമ്മീഷണർ പ്രേം ആനന്ദ് സിൻഹ പറഞ്ഞു. അതേസമയം സംഭവത്തിൽ പൊലീസ് അന്വേഷണം ആരംഭിച്ചു.
