എറണാകുളം: കരുവന്നൂർ സഹകരണ ബാങ്കിൽ സിപിഎമ്മിന് 5 രഹസ്യ അക്കൗണ്ടുകളുണ്ടെന്ന് ഇഡി. തെരഞ്ഞെടുപ്പ് കമ്മീഷന് ഇഡി കൈമാറിയത് സിപിഎം വെളിപ്പെടുത്താതിരുന്ന ലോക്കൽ കമ്മിറ്റികളുടെ അക്കൗണ്ട് വിവരമാണെന്ന് റിപ്പോർട്ട്. പുറത്തശ്ശേരി സൗത്ത്, നോർത്ത് ലോക്കൽ കമ്മിറ്റികളുടെ വിവരങ്ങളണ് കൈമാറിയത്. ഈ രണ്ട് ലോക്കൽ കമ്മിറ്റികളുടെ പേരിൽ കരുവന്നൂരിൽ അഞ്ച് അക്കൗണ്ടുകളുണ്ടന്നും ഇഡി തെരഞ്ഞടുപ്പ് കമ്മീഷൻ, കേന്ദ്ര ധനമന്ത്രാലയം റിസർവ് ബാങ്ക്,
എന്നിവയ്ക്ക് റിപ്പോർട്ട് നൽകിയെന്നുമാണ് വിവരം.
സിപിഎം നേതാക്കൾ നൽകിയത് ഏരിയ കമ്മിറ്റികളുടെ വിവരമാണെന്നും ബ്രാഞ്ച് കമ്മിറ്റികളുടെ പേരിലുള്ള വിവരം കൈമാറിയില്ലെന്നും ഇഡിയുടെ റിപ്പോർട്ടിലുണ്ട്.
സംസ്ഥാനത്ത് സിപിഎം ഭരിക്കുന്ന സഹകരണ ബാങ്കുകളിൽ പാർട്ടിക്കുള്ള രഹസ്യ നിക്ഷേപം സംബന്ധിച്ച് റിസർവ് ബാങ്ക് വിശദമായ അന്വേഷണം നടത്തണമെന്നും ഇഡി ശുപാർശ ചെയ്തുവെന്നാണ് സൂചന.
അതേസമയം, ചോദ്യം ചെയ്യലിന് ഹാജരാവാനുള്ള ഇഡിയുടെ നോട്ടിസ് കിട്ടിയിട്ടില്ലെന്നും കിട്ടിയാൽ പാർട്ടി നേതൃത്വവുമായി ആലോചിച്ചു മറുപടി നൽകുമെന്നും എംഎം വർഗീസ് പ്രതികരിച്ചു.
