പരീക്ഷകളെല്ലാം കഴിഞ്ഞ് അവധിക്കാലം ആസ്വദിക്കാൻ വിനോദസഞ്ചാര കേന്ദ്രങ്ങളുടെ ലിസ്റ്റുകൾ തിരയുകയായിരിക്കും ഇപ്പോൾ മിക്ക വിദ്യാർത്ഥികളും അവരുടെ കുടുംബവും. വേനൽ അവധി മറ്റൊരു രാജ്യത്ത് ആഘോഷിക്കാൻ പദ്ധതിയിടുന്നവരാണ് നിങ്ങളെങ്കിൽ വേഗം ഷാർജയിലേക്ക് ടിക്കറ്റുകൾ എടുത്തോളൂ.. ഹൽ ഹഫയ്യ തടാകം സന്ദർശകർക്കായി തുറക്കുന്നു..
യുഎഇ നിവാസികൾക്കും വിനോദസഞ്ചാരികൾക്കും പുത്തൻ അനുഭവം പകരുന്നതിനായും ജലസംരക്ഷണത്തിനായും ഹൽ ഹഫയ്യ തടാകം തുറക്കുകയാണ്. ഷാർജയിലെ അടിസ്ഥാന സൗകര്യ വികസന പദ്ധതികളിൽ ഉൾപ്പെടുന്ന ഒന്നാണ് ഹൽ ഹഫയ്യ തടാകം. ഈ തടാകത്തിന് 1,32,000 ചതുരശ്രമീറ്റർ വിസ്തൃതിയുണ്ട്. കുട്ടികൾക്കായുള്ള പാർക്കുകൾ, പർവ്വതപാത, ബോട്ടിംഗ് സർവീസുകൾ തുടങ്ങിയവയാണ് ഇവിടുത്തെ പ്രധാന ആകർഷണങ്ങൾ.
തടാകത്തിന് സമീപത്തായി സ്ഥിതി ചെയ്യുന്ന അൽ ഹെഫയ്യ വിശ്രമ കേന്ദ്രവും യാത്രികർക്ക് പ്രകൃതി ഭംഗി ആസ്വദിക്കുന്നതിനുള്ള മികച്ചയിടമാണ്. തടാകവും കൽബയ്ക്ക് സമീപമുള്ള പർവ്വതനിരകളും ആസ്വദിക്കാനുള്ള സൗകര്യങ്ങൾ വിശ്രമകേന്ദ്രത്തിലുണ്ട്. ഇവിടെ തന്നെ ഒരു വശത്ത് മനോഹരമായ വെള്ളച്ചാട്ടവും മറുവശത്ത് സുഗന്ധം പരത്തുന്ന പൂന്തോട്ടങ്ങളും പുൽമേടുകളുമുണ്ട്. തടാകത്തിന് ചുറ്റും രണ്ട് വരി പാതയുള്ളതിനാൽ വിനോദസഞ്ചാരികൾക്ക് ഇതിലൂടെ നടന്ന് കാഴ്ചകൾ കാണാനും പ്രകൃതിസൗന്ദര്യം ആസ്വദിക്കാനും സാധിക്കും. ഷാർജാ ഭരണാധികാരിയായ ഷെയ്ഖ് സുൽത്താൻ ബിൻ മുഹമ്മദ് അൽ ഖാസിമിയാണ് തടാകം ഉദ്ഘാടനം ചെയ്തത്.