ബെംഗളൂരു: ചിന്നസ്വാമിയിൽ ആർ.സി.ബിക്കെതിരെ ആടിത്തിമിർത്ത് ക്വിന്റൺ ഡികോക്കും നിക്കോളസ് പൂരാനും. നിശ്ചിത ഓവറിൽ 5 വിക്കറ്റ് നഷ്ടത്തിൽ 181 റൺസാണ് സൂപ്പർ ജയന്റ്സ് കുറിച്ചത്. 16 ഓവർ വരെ ലക്നൗ ഇന്നിംഗ്സിനെ തോളേറ്റി മുന്നോട്ട് നയിച്ചത് 56 പന്തിൽ 81 റൺസടിച്ച ക്വിന്റൺ ഡികോക്കായിരുന്നു. 14 പന്തിൽ 20 റൺസെടുത്ത ക്യാപ്റ്റൻ കെ.എൽ രാഹുൽ ഇന്നും നിരാശപ്പെടുത്തി.
ആറു റൺസുമായി ദേവ്ദത്ത് പടിക്കലും ഒമ്പതാം ഓവറിൽ വീണതോടെ മാർക്കസ് സ്റ്റോയിനസിനെ കൂട്ടുപിടിച്ചാണ് പൂരാൻ സ്കോർ ഉയർത്തിയത്. നല്ല തുടക്കം കിട്ടിയെങ്കിലും സ്റ്റോയിനസിന് വലിയ സ്കോർ നേടാനായില്ല. 15 പന്തിൽ 24 റൺസ് നേടിയ താരത്തെ മാക്സ് വെൽ മടക്കി. മാക്സ് വെല്ലിന്റെയും യഷ് ദയാലിന്റെയും ഓവറുകളാണ് ലക്നൗവിനെ 200 കടക്കാതെ പിടിച്ചു നിർത്തിയത്.
പിന്നീട് ക്രീസിലെത്തിയ നിക്കോളാസ് പൂരാനാണ് കടന്നാക്രമണത്തിലൂടെ ലക്നൗവിനെ 180 കടത്തിയത്. അഞ്ചു പടുകൂറ്റൻ സിക്സറുകൾ പറത്തിയ പൂരാൻ 21 പന്തിൽ 40 റൺസ് നേടി. ആർ.സി.ബിക്ക് വേണ്ടി മാക്സ് വെൽ രണ്ടു വിക്കറ്റ് നേടി. 19-ാം ഓവറിൽ ടോപ്ലിയെ തുടരെ മൂന്ന് സിക്സറിന് പറത്തിയ പൂരാൻ ആ ഓവറിൽ 20 റൺസ് നേടി. കൂട്ടത്തിൽ തല്ല് കിട്ടാതിരുന്ന യഷ് ദയാലിന് ഒരു വിക്കറ്റ് ലഭിച്ചു. മുഹമ്മദ് സിറാജ്,റീസെ ടോപ്ലി എന്നിവർക്കും ഓരോ വിക്കറ്റ് വീതവും.
