കൊല്ലം: അച്ഛന് വേണ്ടി കൊല്ലം നിയോജക മണ്ഡലത്തിൽ പ്രചാരണത്തിന് ഇറങ്ങുമെന്ന് ജി.കൃഷ്ണകുമാറിന്റെ മകൾ ദിയ കൃഷ്ണ. മണ്ഡലത്തിലെ എല്ലാ വോട്ടർമാരോടും ദിയ കൃഷ്ണ വോട്ട് രേഖപ്പെടുത്താനും അഭ്യർത്ഥിച്ചു. കൊല്ലത്ത് കൃഷ്ണകുമാറിനൊപ്പം നാമനിർദ്ദേശ പത്രിക സമർപ്പിക്കാൻ എത്തിയതായിരുന്നു ദിയ കൃഷ്ണ.
‘അച്ഛന് വേണ്ടി പ്രചാരണത്തിന് പങ്കെടുക്കും. എന്നെ കൊണ്ട് പറ്റുന്ന ദിവസമൊക്കെ പ്രചാരണത്തിനായി കൊല്ലത്ത് ഉണ്ടാകും. അച്ഛനിലുള്ള വിശ്വാസത്തിലാണ് ഞാൻ പറയുന്നത്. എല്ലാവരോടും വിനീതമായി പറയുകയാണ് അച്ഛന് വേണ്ടി വോട്ട് ചെയ്യേണ്ടതാണ്. അച്ഛൻ ഏതൊരു പാർട്ടിയിൽ പ്രവർത്തിച്ചാലും നല്ലത് മാത്രമേ ചെയ്യുകയുള്ളൂ. അച്ഛന്റെ പാർട്ടിയെ ഞാൻ എപ്പോഴും സപ്പോർട്ട് ചെയ്യും. നരേന്ദ്രമോദിയോളം സ്വാധീനം ഇന്ത്യയിലെ മറ്റൊരു പ്രധാനമന്ത്രിയും ഉണ്ടാക്കിയിട്ടില്ല.
നരേന്ദ്രമോദിയുടെ വീഡിയോയൊക്കെ കാണുമ്പോൾ ഒരു സൂപ്പർ സ്റ്റാർ വരുന്ന ഫീലാണ് ഉണ്ടാകുന്നത്. സാധാരണ ഒരു പ്രധാനമന്ത്രി വരുന്നു എന്നൊരു ഫീൽ അല്ലെന്നും ദിയ കൃഷ്ണ പറഞ്ഞു.
ഇന്ന് ഉച്ചയോടെയാണ് കൊല്ലം ലോക്സഭാ മണ്ഡലത്തിലെ എൻഡിഎ സ്ഥാനാർത്ഥി ജി. കൃഷ്ണകുമാർ നാമനിർദ്ദേശ പത്രിക സമർപ്പിച്ചത്. ചിന്നക്കടയിൽ നിന്നും കളക്ടറേറ്റിലേക്ക് പ്രകടനമായിട്ടെത്തിയാണ് പത്രിക സമർപ്പണം നടത്തിയത്. കൊല്ലം ജില്ലാ കളക്ടർ എൻ ദേവിദാസിനാണ് പത്രിക നൽകിയത്. പത്രിക സമർപ്പിക്കാൻ കൃഷണകുമാറിനൊപ്പം ഭാര്യ സിന്ധു, മകൾ ദിയ കൃഷ്ണ ,ബിജെപി ജില്ലാ പ്രസിഡന്റ് ബി.ബി ഗോപകുമാർ, കെ.എൻ സോമൻ എന്നിവരും ഒപ്പമുണ്ടായിരുന്നു.