ഭോപ്പാൽ: ഉജ്ജയിനിലെ മഹാകാലേശ്വര ക്ഷേത്രത്തിൽ ദർശനം നടത്തി ബിജെപി ദേശീയ അദ്ധ്യക്ഷൻ ജെപി നദ്ദ. രണ്ട് ദിവസത്തെ മദ്ധ്യപ്രദേശ് സന്ദർശനത്തിനിടെ ആയിരുന്നു അദ്ദേഹം ക്ഷേത്രത്തിലെത്തിയത്. മുഖ്യമന്ത്രി മോഹൻ യാദവും നദ്ദയ്ക്കൊപ്പം ഉണ്ടായിരുന്നു.
ഭക്തിയും ആത്മീയതയും അലൗകികമായ സമാധാനവും നിറഞ്ഞ ഈ പുണ്യസ്ഥലം തന്നിൽ പുതിയ ഊർജ്ജവും പ്രചോദനവും നിറച്ചതായി നദ്ദ ട്വിറ്ററിൽ കുറിച്ചു. രാജ്യത്തെ ജനങ്ങളുടെ സന്തോഷത്തിനും അഭിവൃദ്ധിക്കും ആരോഗ്യത്തിനും വേണ്ടി പ്രാർത്ഥിച്ചതായും അദ്ദേഹം കൂട്ടിച്ചേർത്തു.
ക്ഷേത്ര ദർശനത്തിന് ശേഷം അദ്ദേഹം രാജസ്ഥാനിലെ ജലാവറിലേക്ക് പോയി. ജലാവറിലെ റാലിക്ക് ശേഷം ഇൻഡോറിൽ ബിജെപിയുടെ കോർ കമ്മിറ്റി യോഗത്തിലും ക്ലസ്റ്റർ യോഗത്തിലും നദ്ദ പങ്കെടുക്കും. ലോക്സഭാ തെരഞ്ഞെടുപ്പുമായി ബന്ധപ്പെട്ടാണ് യോഗങ്ങൾ.
വൈകിട്ട് 7.20-ഓടെ പദ്മശ്രീ എച്ച്സി ദവാറുമായി ജബൽപൂരിലെ പ്രേംനഗറിലുള്ള അദ്ദേഹത്തിന്റെ വസതിയിൽ കൂടിക്കാഴ്ച നടത്തും. 20 രൂപ മാത്രം വാങ്ങി പാവപ്പെട്ട രോഗികളെ ചികിത്സിച്ച് രാജ്യത്തെ പരമോന്നത ബഹുമതി നേടിയ വ്യക്തിയാണ് ഡോക്ടർ എച്ച്സി ദവാർ.
