തലയോലപ്പറമ്പ്: മുഖ്യമന്ത്രി പിണറായി വിജയന്റെ പ്രസംഗത്തിനിടെ മൈക്ക് ഒടിഞ്ഞു വീണു. തലയോലപ്പറമ്പിൽ തോമസ് ചാഴിക്കാടന്റെ പ്രചാരണ പരിപാടിയിൽ പങ്കെടുക്കുന്നതിനിടെ ആയിരുന്നു സംഭവം.
പ്രസംഗം തുടങ്ങിയതിന് പിന്നാലെ ശരിയായി ശബ്ദം കേൾക്കുന്ന വിധം മൈക്ക് നേരെയാക്കി വെക്കാൻ മുഖ്യമന്ത്രി ശ്രമിച്ചു. പക്ഷെ ബലമായി പിടിച്ചതിനാൽ പ്രസംഗ പീഠത്തിൽ കണക്ട് ചെയ്തിരുന്ന മൈക്ക് ഇളകി വീഴുകയായിരുന്നു. പാർലമെന്റ് തെരഞ്ഞെടുപ്പിന്റെ പ്രാധാന്യം എല്ലാവർക്കും നല്ല നിലയ്‌ക്ക് ബോധ്യമുളള കാര്യമാണ് എന്ന് പറഞ്ഞ് പ്രസംഗം ആരംഭിച്ചതിന് പിന്നാലെ ആയിരുന്നു സംഭവം.
മൈക്ക് ഇളകി മേശപ്പുറത്ത് വീണതോടെ പ്രസംഗം തുടരാനാകാതെ മുഖ്യമന്ത്രി നിസ്സഹായനായി നിന്നു. വേദിയിൽ ഉണ്ടായിരുന്ന വി.എൻ വാസവൻ അടക്കമുളളവർ മുഖ്യമന്ത്രിക്ക് സമീപം വന്ന് പ്രശ്‌നം പരിഹരിക്കാൻ ശ്രമിച്ചെങ്കിലും മൈക്ക് ഇളകി വീണതിനാൽ ഒന്നും ചെയ്യാനായില്ല. പകരം മറ്റൊരു മൈക്ക് നൽകിയെങ്കിലും മുഖ്യമന്ത്രി ഇരിപ്പിടത്തിലേക്ക് മടങ്ങി.
ഒടുവിൽ മൈക്ക് ശരിയാക്കിയതിനുശേഷമാണ് പ്രസംഗം പുനരാരംഭിച്ചത്.
