മത്സ്യവിഭവങ്ങൾ പൊതുവെ മലയാളികൾക്ക് പ്രിയമാണ്. ലോബ്സ്റ്റർ, ട്യൂണ, കൊഞ്ച് എന്നിങ്ങനെ വിവിധ തരത്തിലുള്ള കടൽ വിഭവങ്ങൾ ഇന്ന് വിപണിയിൽ സുലഭമാണ്. ഇത്തരം മത്സ്യങ്ങളിൽ ഒമേഗ 3 പോലുള്ള ധാരാളം പോഷകഘടങ്ങൾ അടങ്ങിയിട്ടുള്ളതിനാൽ ആരോഗ്യം വർദ്ധിപ്പിക്കാൻ ഇവ സഹായകമാണ്. എന്നാൽ സ്ഥിരമായി കടൽവിഭവങ്ങൾ ഭക്ഷണത്തിലുൾപ്പെടുത്തുന്നത് ശരീരത്തെ ദോഷകരമായി ബാധിക്കുമെന്നാണ് പുതിയ പഠനങ്ങൾ പറയുന്നത്.
ആരോഗ്യത്തെ ദോഷകരമായി ബാധിക്കുന്ന പെർ-ആൻഡ്- പോളി- ഫ്ളോറോക്കെയിൽ എന്ന ഘടകങ്ങളും ഇവയിൽ അടങ്ങിയിട്ടുണ്ട്. ‘ഫോർ എവർ കെമിക്കൽസ്’ എന്നാണ് ഇവ ശാസ്ത്രജ്ഞർക്കിടയിൽ പൊതുവെ അറിയപ്പെടുന്നത്. ലോബസ്റ്റർ, ട്യൂണ തുടങ്ങിയ മത്സ്യങ്ങൾ ധാരാളമായും, സ്ഥിരമായും കഴിക്കുന്നത് മറ്റ് രോഗങ്ങളിലേക്കും വഴിവയ്ക്കുന്നു.
ഗർഭിണികളും പ്രായമായവരും കുട്ടികളും ഇത്തരം ഭക്ഷണങ്ങൾ സ്ഥിരമായി കഴിക്കുന്നത് ദോഷമാണെന്നും ഇത് ഗർഭഛിദ്രത്തിനും, കാൻസറിലേക്കും വഴിവച്ചേക്കാമെന്നും പഠനങ്ങൾ പറയുന്നു. ഇതിന് പുറമെ ഫോർമാലിൻ എന്ന രാസവസ്തു ഉപയോഗിച്ചാണ് കടൽവിഭവങ്ങളിൽ മിക്കതും വിപണികളിലെത്തുന്നത്. അതിനാൽ ഇത്തരം വിഭവങ്ങൾ പതിവായി കഴിക്കുന്നത് ആരോഗ്യം നശിക്കാൻ കാരണമാകുന്നുവെന്നും ശാസ്ത്രജ്ഞർ പറയുന്നു.