സിനിമയ്‌ക്ക് പുറമെ സാമൂഹ്യ സേവന രംഗത്തും സജീവമാണ് നടൻ രാഘവ ലോറൻസ്. ജീവകാരുണ്യ പ്രവർത്തനങ്ങളിലൂടെ എപ്പോഴും വാർത്തകളിൽ നിറയുന്ന താരത്തിന്റെ പുതിയൊരു വീഡിയോ വൈറലാവുകയാണ്. ദിവ്യാംഗരായ 13 പേർക്ക് യാത്ര ചെയ്യാനായി ഇരുചക്ര വാഹനങ്ങൾ നൽകിയിരിക്കുകയാണ് താരം.
സാമ്പത്തികമായി ഏറെ ബുദ്ധിമുട്ടുകൾ അനുഭവിക്കുന്ന ഇവർക്ക് വീടും യാത്ര ചെയ്യാൻ വാഹനവും നൽകുമെന്ന് താരം വാഗ്ദാനം ചെയ്തിരുന്നു. ഇതിന്റെ ആദ്യ ഘട്ടമെന്ന നിലയിലാണ് 13 സ്‌കൂട്ടറുകൾ നൽകിയതെന്ന് രാഘവ ലോറൻസ് പറഞ്ഞു. സ്‌കൂട്ടറുകൾ മുച്ചക്ര വാഹനങ്ങളാക്കി മാറ്റും. വീട് പണികൾ ഉടൻ ആരംഭിക്കുമെന്നും അദ്ദേഹം പറഞ്ഞു.
View this post on Instagram
സ്‌കൂട്ടറുകൾ നൽകിയ ദിവ്യാഗരായ വ്യക്തികൾക്കൊപ്പം രാഘവ ലോറൻസ് ഏറെ നേരം സംസാരിച്ചു. അവരുടെ പ്രശ്നങ്ങൾ ചോദിച്ചറിയുകയും ചെയ്തു. ‘ ഞങ്ങളുടെ ദൈവം’ എന്നാണ് സ്‌കൂട്ടർ ഏറ്റുവാങ്ങിയവർ പറഞ്ഞത്. വീഡിയോ പുറത്തുവന്നതിന് പിന്നാലെ നിരവധി പേരാണ് കമന്റുകളുമായി രംഗത്ത് എത്തിയത്. ലോറൻസ് മാസ്റ്ററെ സൂപ്പർ താരങ്ങൾ കണ്ട് പഠിക്കണം എന്നാണ് പലരുടെയും അഭിപ്രായം.
