ചെന്നൈ: വോട്ട് ചെയ്യാൻ സാധിക്കാതെ പോളിംഗ് ബൂത്തിൽ നിന്ന് മടങ്ങി തമിഴ് നടൻ സൂരി. വോട്ടർ പട്ടികയിൽ പേരില്ലാത്തതിനാലാണ് താരത്തിന് വോട്ട് ചെയ്യാൻ സാധിക്കാതിരുന്നത്. നിരാശ പ്രകടിപ്പിച്ച താരം ആരാധകരോട് വോട്ട് ചെയ്യാൻ അഭ്യർത്ഥിച്ച ശേഷമാണ് പോളിംഗ് ബൂത്തിൽ നിന്ന് മടങ്ങിയത്.
കഴിഞ്ഞ തെരഞ്ഞെടുപ്പുകളിൽ താൻ വോട്ട് ചെയ്തതാണെന്നും ഇന്ന് പോളിംഗ് സ്റ്റേഷനിൽ എത്തിയപ്പോഴാണ് വോട്ടേഴ്സ് ലിസ്റ്റിൽ തന്റെ പേരില്ലെന്ന് അറിഞ്ഞതെന്നും സൂരി മാദ്ധ്യമങ്ങളോട് പറഞ്ഞു. ഈ സംഭവത്തിൽ ആരെയാണ് കുറ്റപ്പെടുത്തേണ്ടതെന്ന് അറിയില്ല. വോട്ട് ചെയ്യാൻ സാധിക്കാത്തത് നിരാശാജനകമാണെന്നും സൂരി പറഞ്ഞു. ഭാര്യയുടെ പേര് ലിസ്റ്റിലുണ്ടായിരുന്നു, അവർ വോട്ട് ചെയ്തു.
വോട്ട് ചെയ്യാൻ സാധിക്കാത്തതിന്റെ കാരണം വെളിപ്പെടുത്തുന്ന വീഡിയോ താരം സോഷ്യൽ മീഡിയയിലും പങ്കുവച്ചിരുന്നു. അതേസമയം തമിഴ്നാട്ടിൽ വോട്ടർ പട്ടികയിൽ പേരില്ലാത്തതിനാൽ നിരവധി പേർക്ക് വോട്ട് ചെയ്യാൻ സാധിച്ചില്ലെന്ന പരാതി ഉയരുന്നുണ്ട്.
