സെക്കൻഡുകൾ കൊണ്ട് ചാർജ് ചെയ്യാവുന്ന സോഡിയം ബാറ്ററി വികസിപ്പിച്ചെടുത്ത് ദക്ഷിണ കൊറിയൻ ഗവേഷകർ. കൊറിയ അഡ്വാൻസ് ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജിയിലെ ഗവേഷകരായ ജോങ് ഹുയി ചോയിയും ഡോങ് വോൺ കിമ്മുമാണ് കണ്ടുപിടിത്തത്തിന് പിന്നിൽ പ്രവർത്തിച്ചത്.
പുതിയതായി വികസിപ്പെച്ചെടുത്ത ഹൈബ്രിഡ് സോഡിയം-അയോൺ ബാറ്ററി സാങ്കേതിക ലോകത്ത് നിർണ്ണായക മാറ്റങ്ങൾക്ക് വഴിവെക്കുമെന്നാണ് വിലയിരുത്തുന്നത്. ഇത് സംബന്ധിച്ച ലേഖനം എനർജി സ്റ്റോറേജ് മെറ്റീരിയൽസ് ജേണലിൽ പ്രസിദ്ധീകരിച്ചു.
എന്തുകൊണ്ട് ഒരു സോഡിയം ബാറ്ററി?
ലിഥിയത്തേക്കാൾ 1000 മടങ്ങ് ലഭ്യതയുള്ള ധാതുവാണ് സോഡിയം. ലോകത്തിന്റെ എത് ഭാഗത്തും സുലഭമായി ലഭിക്കുന്ന ഘടകമായതിനാൽ സോഡിയം-അയോൺ ബാറ്ററി നിർമാണത്തിന് ചെലവ് കുറവായിരിക്കും.
ലിഥിയം-അയോൺ ബാറ്ററികളുടെ സ്ഥാനം അധികം വൈകാതെ സോഡിയം ബാറ്ററി കൈയ്യടുക്കമെന്നാണ് ഗവേഷകരുടെ അഭിപ്രായം. സെക്കൻഡുകൾ നീണ്ടു നിൽക്കുന്ന ഒറ്റ ചാർജിലുടെ ദീർഘനേരം പ്രവർത്തിക്കുമെന്നാണ് ഇതിന്റെ പ്രധാന സവിശേഷത.
മൊബൈൽ, ഇലക്ട്രോണിക് ഉപകരണങ്ങൾ മുതൽ ഇലക്ട്രിക് വാഹനങ്ങൾക്ക് (ഇവികൾ)വരെ പുതിയ ബാറ്ററിയുടെ രംഗപ്രവേശം ഗുണകരമാകും. നിലവിൽ സോഡിയം-അയോൺ ഹൈബ്രിഡ് എനർജി സ്റ്റോറേജ് (SIHES) സെല്ലുകൾ വികസിപ്പിക്കുന്നതിലാണ് ഗവേഷകർ ശ്രദ്ധ കേന്ദ്രീകരിച്ചിരിക്കുന്നത്.
