ആവാസ വ്യവസ്ഥയിലെ മനുഷ്യന്റെ അനിയന്ത്രിതമായ കടന്നുകയറ്റം , അനിയന്ത്രിതമായ വികസന പ്രവർത്തനങ്ങൾ, കാലാവസ്ഥാ വ്യതിയാനം, മലിനീകരണം, വേട്ടയാടൽ, വന്യജീവി കള്ളക്കടത്ത്, എന്നിവയാണ് ഇന്ന് ജീവി വർഗങ്ങൾ നേരിടുന്ന പ്രധാന ഭീഷണികൾ . ആഗോളതലത്തിൽ വംശനാശ ഭീഷണി നേരിടുന്നില്ല എന്നു കണ്ടെത്തുന്ന പലല ജീവിവർഗങ്ങളും പ്രാദേശിക തലത്തിൽ ഗുരുതരമായ വംശനാശ ഭീഷണി നേരിടുന്നവയാണ് .
ഇന്ത്യയിൽ വംശനാശഭീഷണി നേരിടുന്ന ചില ജീവി വർഗങ്ങളെ കുറിച്ച് അറിയാം
ബംഗാൾ കടുവ
ലോകത്തിലെ മൊത്തം കടുവയുടെ പകുതിയോളം ബംഗാൾ കടുവകളാണ് . അതിൽ 70% ഇന്ത്യയിലാണ് ജീവിക്കുന്നത് .കണ്ടൽക്കാടുകൾ, തണ്ണീർത്തടങ്ങൾ എന്നിവയുൾപ്പെടെ വിവിധ ആവാസ വ്യവസ്ഥകളിൽ ജീവിക്കാൻ കഴിയുന്ന, ചൂടും തണുപ്പും ഉള്ള താപനിലയെ നേരിടാൻ കഴിവുള്ള ഇവയുടെ എണ്ണം വർഷങ്ങളായി കുറഞ്ഞു വരികയാണ് . പതിറ്റാണ്ടുകളായി ചർമ്മത്തിനും ശരീരഭാഗങ്ങൾക്കും വേണ്ടിയുള്ള നിരന്തരമായ വേട്ടയാടൽ, ആവാസവ്യവസ്ഥയുടെ മാറ്റം എന്നിവ ഇവയുടെ വംശനാശഭീഷണിയ്ക്ക് കാരണമായി.
ഈനാംപേച്ചി
ഇന്ന് ഏറ്റവും കൂടുതൽ വംശനാശ ഭീഷണി നേരിടുന്ന ജന്തുവർഗങ്ങളിലൊന്ന് ഈനാംപേച്ചിയാണ് . ഏഷ്യ – ആഫ്രിക്ക വൻകരകളിൽ 8 സ്പീഷീസുകളായി ഈനാംപേച്ചികൾ കാണപ്പെടുന്നു. വലിപ്പത്തിനനുസരിച്ച് ഒന്നരക്കിലോ മുതൽ 33 കിലോ വരെ ഇവയ്ക്ക് തൂക്കമുണ്ട്. പുറത്തുള്ള കെരാറ്റിൻ ശൽക്കങ്ങളാണ് ഇവയുടെ രക്ഷാകവചം.ചൈനയിലും വിയറ്റ്നാമിലും അമേരിക്കയിലുമാണ് ഈനാംപേച്ചികൾ കൂടുതൽ വെല്ലുവിളി നേരിടുന്നത്. കഴിഞ്ഞ 10 വർഷത്തിനിടെ 10 ലക്ഷത്തിലധികം ഈനാംപേച്ചികൾ വേട്ടയാടപ്പെട്ടുഎന്നാണ് കണക്കുകൾ.
മരപ്പട്ടി
മൂന്നുമുതൽ മൂന്നരകിലോഗ്രാം വരെ ഭാരമുണ്ടാകാറുള്ള മരപ്പട്ടികൾക്ക് മൂക്കുമുതൽ വാലിന്റെ അറ്റം വരെ ഏകദേശം ഒരു മീറ്റർ നീളമുണ്ടായിരിക്കും. വാലിനു ഏകദേശം 45 സെന്റീമീറ്ററാണു നീളമുണ്ടായിരിക്കും .ഏഷ്യയിലെമ്പാടുമായി മരപ്പട്ടികളുടെ 16 ഉപജാതികളെ കണ്ടെത്തിയിട്ടുണ്ട്. ഇറച്ചിയ്ക്കായി മരപ്പട്ടികളെ കൊല്ലാറുണ്ട്. അതുപോലെ വെരുകു വംശത്തിൽ പെട്ട ജീവികളെ അവയുടെ സുഗന്ധോത്പാദന കഴിവുകൊണ്ടും, മരുന്നുകളുണ്ടാക്കാനും പിടിക്കുന്നതിനാൽ, മരപ്പട്ടികളേയും പിടിക്കാറുണ്ട്. 1972-ലെ ഇന്ത്യൻ വന്യജീവി (സംരക്ഷണ) നിയമപ്രകാരം സംരക്ഷിക്കപ്പെട്ടിട്ടുള്ള ജീവിയാണ് മരപ്പട്ടി.
ഹിമപ്പുലികൾ
ഹിമപ്പുലികൾക്ക് വളരെ വലിയ ആവാസ വ്യവസ്ഥകളുണ്ടായിരുന്നു. കൂടാതെ ഏഷ്യയിലെ പർവതനിരകളിലും ഇവയെ കണ്ടിരുന്നു . ഇപ്പോൾ, ലഡാക്ക്, ഹിമാചൽ പ്രദേശ്, ഉത്തരാഖണ്ഡ്, ഹിമാലയത്തിന്റെ പടിഞ്ഞാറൻ, കിഴക്കൻ ഭാഗങ്ങൾ എന്നിവിടങ്ങളിൽ മാത്രമേ ഇവയെ കാണാനാകൂ, ഇന്ത്യയിൽ ഇവ 500 ൽ താഴെയാണ്. പെൺ ഹിമപ്പുലികൾ രണ്ട് വർഷത്തിലൊരിക്കൽ ഒന്നോ രണ്ടോ കുഞ്ഞുങ്ങൾക്ക് മാത്രമേ ജീവൻ നൽകാറുള്ളൂ .
ലോകത്തിലെ അത്യപൂർവമായതും വംശ നാശഭീഷണി നേരിടുന്നതുമായ പ്രൈമേറ്റ് വിഭാഗക്കാരാണ് സിംഹവാലൻ കുരങ്ങുകൾ. കേരളം കർണാടകം, തമിഴ്നാട് എന്നിവിടങ്ങളിലെ ഉയരമുള്ള മഴക്കാടുകളിൽ മാത്രമേ ഇവയുള്ളൂ.ഇന്ന് നാലായിരത്തിൽ താഴെ സിംഹവാലൻ കുരങ്ങുകളേ അവശേഷിക്കുന്നുള്ളൂ. ജീവി ഏതായാലും അവയുടെ വംശനാശഭീഷണിക്കു പിന്നിലുള്ള കാരണം ഒന്നു തന്നെ, മനുഷ്യരുടെ കാട് കയ്യേറ്റവും കയ്യും കണക്കുമില്ലാത്ത വേട്ടയും
1970കളിൽ സൈലന്റ് വാലിയിലെ കുന്തിപ്പുഴയിൽ വൈദ്യുതിയുൽപാദനത്തിനായി അണക്കെട്ട് നിർമിക്കാൻ സർക്കാർ തീരുമാനിച്ചു. ഉയരമുള്ള മരങ്ങളിൽ ചെറുകൂട്ടങ്ങളായി കഴിഞ്ഞുപോന്ന സിംഹവാലൻ കുരങ്ങുകൾ അതോടെ പ്രശസ്തിയിലേക്കുയർന്നു. പദ്ധതി നടപ്പിലായാൽ ഒട്ടേറെ വനവും ഒപ്പം സിംഹവാലനെപ്പോലുള്ള അപൂർവ ജീവികളും നശിക്കുമെന്ന് തിരിച്ചറിഞ്ഞ പ്രകൃതിസ്നേഹികൾ ശക്തമായ പ്രക്ഷോഭം നടത്തി. ഇന്ത്യയെങ്ങും ആളിപ്പടർന്ന ഈ പ്രക്ഷോഭങ്ങളുടെ പ്രതീകമായി മാറിയത് സിംഹവാലൻ കുരങ്ങുകളാണ്.
