ആരോഗ്യത്തിനേറെ ഗുണം ചെയ്യുന്നതാണ് ഇലക്കറികൾ. ചീരയും മുരിങ്ങയിലയും മത്തയിലയും മാത്രം കഴിച്ച് ശീലിക്കുന്നവരായ നമ്മളിൽ പലർക്കും അറിയാത്ത ഒന്നാണ് ചേമ്പില. തോരനായും കറിയായുമൊക്കെ ചേമ്പില പാകം ചെയ്യാവുന്നതാണ്. ഏറെ ആരോഗ്യ ഗുണങ്ങൾ നിറഞ്ഞതാണ് ചേമ്പില.
വെെറ്റമിൻ എ, ബി,സി, തയാമിൻ, റൈബോഫ്ലേവിൻ, ഫോളേറ്റ്, മംഗനീസ്, കോപ്പർ, പൊട്ടാസ്യം, അയൺ എന്നിവയും ചേമ്പിലയിൽ സമ്പന്നമാണ്. പേശികളുടെ ആരോഗ്യത്തിനും കണ്ണിന്റെ ആരോഗ്യത്തിനും ചേമ്പില സഹായിക്കുന്നു. എല്ലാ ഇലകളെയും പോലെ ചേമ്പിലയും രക്തം വർദ്ധിപ്പിക്കാൻ സഹായിക്കുന്നു. ശരീരത്തിലുണ്ടാകുന്ന തളർച്ചയും ക്ഷീണവുമൊക്കെ പരിഹരിക്കാനും ചേമ്പിലയ്ക്ക് കഴിയുന്നു. ഗർഭകാലത്ത് കുഞ്ഞിന്റെ തലച്ചോറിന്റെ വളർച്ചയെ സഹായിക്കുന്ന ഫോളേറ്റുകളും ചേമ്പിലയിൽ സമ്പന്നമാണ്.
ഗർഭസ്ഥ ശിശുവിന്റെ വളർച്ചയ്ക്കും വികാസത്തിനും ചേമ്പില കഴിക്കുന്നത് നല്ലതാണ്. ദഹനം മെച്ചപ്പെടുത്തുന്നതിനും ചേമ്പില സഹായിക്കുന്നു. കുടലിന്റെ ആരോഗ്യത്തിനും ഇത് മികച്ചതാണ്. ആരോഗ്യദായകമായ ചേമ്പില തോരനായും കഴിക്കാം… ദാ ഇങ്ങനെ..
തളിരില വേണം കറി വയ്ക്കാനെടുക്കാൻ. ചേമ്പിലയെ തണ്ടിൽ നിന്ന് വേർപ്പെടുത്തിയെടുക്കുകയാണ് ആദ്യം ചെയ്യേണ്ടത്. പിന്നാലെ ചേമ്പില ചെരുതായി അരിഞ്ഞെടുക്കുക. ഉണക്കമുളക് ചതച്ചെടുക്കുക. ഇതിലേക്ക് ചെറുവുള്ളിയും ചേർത്ത് ചതയ്ക്കുക.
ചട്ടിയിൽ വെളിച്ചെണ്ണ ഒഴിച്ച് ചതച്ചെടുത്ത ഉള്ളിയും മുളകും കറിവേപ്പിലയും ചേർത്ത് വഴറ്റുക. നിറം മാറി തുടങ്ങുമ്പോൾ മഞ്ഞപ്പൊടി ചേർത്തുകൊടുക്കുക. ഇതിലേക്ക് തേങ്ങ ചിരകിയത് ചേർത്ത് കൊടുക്കുക. ഇതിലേക്ക് ആവശ്യത്തിന് ഉപ്പ് ചേർത്ത് കൊടുക്കുക. ഇതിലേക്ക് അരിഞ്ഞു വച്ചിരിക്കുന്ന ചേമ്പില ചേർക്കുക. തുടർന്ന് മിക്സ് ചെയ്ത് അടച്ച് വച്ച് വേവിക്കുക.