സ്മാർട്ട് ഫോണിനപ്പുറം നിത്യ ജീവിതത്തിൽ ഒഴിച്ചുകൂടാനാവാത്ത ഘടകമായി മാറിയിരിക്കുകയാണ് മെമ്മറി കാർഡുകൾ. സിസിടിവി ക്യാമറകളിലും ഡിഎസ്എൽആർ ക്യാമറകളിലും ഫോണിലുമെല്ലാം മെമ്മറി കാർഡുകൾ സജീവമായി ഉപയോഗിക്കുന്നുണ്ട്. 512 ജിബി കപ്പാസിറ്റി വരെയുള്ള മെമ്മറി കാർഡുകൾ ഇന്ന് വിപണിയിലുണ്ട്. മെമ്മറി കാർഡ് വാങ്ങുമ്പോൾ ശ്രദ്ധിക്കേണ്ട കാര്യങ്ങൾ എന്തൊക്കെ എന്ന് നോക്കാം.
ക്ലാസ് 4,6 എന്നീ സ്പീഡുകൾ നൽകുന്ന മെമ്മറി കാർഡുകളാണ് സാധാരണയായി സ്മാർട്ട് ഫോണിലും ഡിജിറ്റൽ ക്യാമറകളിലും ഉപയോഗിക്കുന്നത്. ചില ഫോണുകളിൽ ക്ലാസ് 10 കാർഡുകളും സപ്പോർട്ട് ചെയ്യും.
4K, HDR തുടങ്ങി ഹൈറെസല്യൂഷൻ വീഡിയോകൾ റെക്കോർഡ് ചെയ്യുന്ന ക്യാമറകളിൽ ഉപയോഗിക്കാൻ U1,U3 എന്നിങ്ങനെയുള്ള അൾട്രാ സ്പീഡ് കാർഡുകൾ വാങ്ങാം.
സ്പീഡാണ് മെമ്മറി കാർഡിൽ ശ്രദ്ധിക്കേണ്ട ഏറ്റവും പ്രധാനപ്പെട്ട കാര്യം. ഡാറ്റകൾ ട്രാൻസ്ഫർ ചെയ്യുന്നതും ഫോട്ടോസ്, വീഡിയോസ് എന്നിവ റെക്കോർഡ് ചെയ്യുന്നതും മെമ്മറി കാർഡിന്റെ സ്പീഡിനെ ആശ്രയിച്ചായിരിക്കും. എല്ലാ കാർഡുകൾക്കും ഒരേ സ്പീഡ് അല്ലാത്തതിനാൽ നമ്മുടെ ആവശ്യത്തെ അടിസ്ഥാനമാക്കിയാണ് കാർഡ് തെരഞ്ഞെടുക്കേണ്ടത്.
കാർഡിന് മുകളിൽ രേഖപ്പെടുത്തിയിരിക്കുന്ന ക്ലാസ് നോക്കിയാണ് സ്പീഡ് തിരിച്ചറിയുന്നത്. 2,4,6,10 ക്ലാസിലും അൾട്രാ സ്പീഡിലും കാർഡുകൾ ലഭ്യമാണ്. കുറഞ്ഞ വേഗത്തിൽ ഡാറ്റ ട്രാൻസ്ഫർ ചെയ്യുന്ന ക്ലാസ് 2 കാർഡുകൾ ഇപ്പോൾ ഉപയോഗിക്കാറില്ല.
മൈക്രോ എസ്ഡി, സ്റ്റാൻഡേർഡ് എസ്ഡി എന്നിങ്ങനെ രണ്ട് തരത്തിലുള്ള കാർഡുകളുണ്ട്. മൈക്രോ എസ്ഡി ഫോണുകൾക്കും സ്റ്റാൻഡേർഡ് എസ്ഡി ക്യാമറകൾക്കും വേണ്ടിയുള്ളതാണ്.
അഡാപ്റ്റർ ഉപയോഗിച്ച് മൈക്രോ എസ്ഡി കാർഡുകൾ ക്യാമറയിൽ പ്രവർത്തിപ്പിക്കാം എങ്കിലും ഇത് കാർഡ് കേടുവരാൻ കാരണമാകുന്നു. കൂടാതെ രണ്ട് സൈസിലുള്ള കാർഡുകൾ ഉപയോഗിക്കുന്ന ഉപകരണങ്ങളിൽ ഒരേ കാർഡ് അഡാപ്റ്റർ ഉപയോഗിച്ച് പ്രവർത്തിപ്പിക്കുന്നതും ഒഴിവാക്കണം.
മെമ്മറി കപ്പാസിറ്റി കൊണ്ട് ഉദ്ദേശിക്കുന്നത് കാർഡിന്റെ സ്റ്റോറേജ് സ്പേസ് മാത്രമല്ല. നമ്മുടെ ഉപകരണം സപ്പോർട്ട് ചെയ്യുന്നത്ര സ്റ്റോറേജ് സ്പേസുളള കാർഡ് നമുക്ക് വാങ്ങാം.
ദിവസേനയുളള ഉപയോഗം ഇടയ്ക്കിയുളള ഉപയോഗം എന്നിങ്ങനെ വിവിധ ആവശ്യങ്ങൾക്കായുളള കാർഡുകൾ ലഭ്യമാണ്. സാധാരണ ആവശ്യങ്ങൾക്കായി ദിവസേനയുളള ഉപയോഗത്തിനായി എസ്ഡിഎച്ച്സി കാർഡ് മതിയാകും.