ഭോപ്പാൽ: വനിതാ ബിജെപി നേതാവിനെ പിസിസി നേതാവ് ജിതു പട്വാരിയ അധിക്ഷേപിച്ച സംഭവത്തിൽ കടന്നാക്രമിച്ച് കേന്ദ്രമന്ത്രിയും ഗുണ മണ്ഡലത്തിലെ എൻഡിഎ സ്ഥാനാർത്ഥിയുമായ ജ്യോതിരാതിദ്യ സിന്ധ്യ. സ്ത്രീകളെ ബഹുമാനിക്കാൻ അറിയാത്തവരാണ് കോൺഗ്രസിലുള്ളതെന്നും, ഉപയോഗിച്ച ശേഷം വലിച്ചെറിയുന്ന സ്വഭാവക്കാരാണ് കോൺഗ്രസ് നേതാക്കളെന്നും സിന്ധ്യ കുറ്റപ്പെടുത്തി. മുൻ കോൺഗ്രസ് എംഎൽഎ ഇമർതി ദേവിയെ മധുരപലഹാരത്തോട് ഉപമിച്ച് പട്വാരി നടത്തിയ വിവാദ പരാമർശത്തിൽ പ്രതികരിക്കുകയായിരുന്നു അദ്ദേഹം.
” ജിതു പട്വാരി സ്ത്രീകൾക്കെതിരെ മോശമായ പരാമർശം നടത്തുമെന്ന് ഞാൻ ഒരിക്കലും വിചാരിച്ചില്ല. സ്ത്രീകളോടുള്ള കോൺഗ്രസിന്റെ മനോഭാവം എന്താണെന്ന് ഇതിൽ നിന്ന് കൃത്യമായി മനസിലാക്കാൻ സാധിക്കും. ദളിതരോ, വനവാസികളോ, തൊഴിലാളികളോ ആരുമായിക്കൊള്ളട്ടെ, ഉപയോഗിച്ച ശേഷം വലിച്ചെറിയുന്ന ശീലമാണ് കോൺഗ്രസിനുള്ളത്.”- ജ്യോതിരാദിത്യ സിന്ധ്യ പറഞ്ഞു.
രാഹുലിന്റെ റായ്ബറേലിയിലെ സ്ഥാനാർത്ഥിത്വത്തെ കുറിച്ചും സിന്ധ്യ വിമർശിച്ചു. സ്വന്തം തട്ടകത്തിൽ നിന്ന് മത്സരിക്കാതെ മറ്റിടങ്ങളിൽ മത്സരിക്കുന്നത് എന്നും ജനങ്ങളിൽ ചോദ്യം ഉയർത്തും. ഇത് അപ്രീതിക്ക് കാരണമാകുമെന്നും സിന്ധ്യ കൂട്ടിച്ചേർത്തു. സ്വന്തം മണ്ണിനോട് ഇഷ്ടമില്ലാത്ത വ്യക്തികളാണ് മറ്റ് മണ്ഡലങ്ങൾ തേടി പോവുന്നത്. താൻ ഗുണയിൽ പരാജിതനായിട്ടുണ്ട്. എന്നാൽ പരാജയ ഭീതി കാരണം മറ്റ് മണ്ഡലങ്ങളിലേക്ക് ചേക്കേറിയില്ല. ഇനിയും ഗുണയിൽ നിന്ന് തന്നെ സേവനം അനുഷ്ഠിക്കുമെന്നും അതിനുള്ള അവസരം ജനങ്ങൾ നൽകുമെന്നും അദ്ദേഹം വ്യക്തമാക്കി.
