സ്ത്രീ പുരുഷ വ്യത്യാസമില്ലാതെ എല്ലാവരെയും ബാധിക്കുന്ന പ്രശ്നമാണ് നെറ്റി കയറുന്നത്. പ്രായമേറുന്തോറും നെറ്റി കയറുന്നത് സാധാരണമാണെങ്കിലും കണക്കിലധികം നെറ്റി കയറുമ്പോഴാണ് ആശങ്കപ്പെടേണ്ടത്.
പല കാരണങ്ങളാണ് നെറ്റി കയറുന്നതിന് പിന്നിൽ. നെറ്റിയിലെ ചെറിയ മുടികൾ കൊഴിഞ്ഞ് പോകുന്നതാണ് ഒരു കാരണം. പോഷകഹാരക്കുറവാണ് ഇതിന് കാരണമാകുന്നത്. പ്രോട്ടീൻ, സിങ്ക്, പൊട്ടാസ്യം തുടങ്ങിയ പോഷകങ്ങളടങ്ങിയ ആഹാരം കഴിച്ചാൽ ഇത്തരം മുടികൊഴിച്ചിൽ കുറയ്ക്കാൻ സാധിക്കും.
വിറ്റാമിൻ കുറവ്, തൈറോയ്ഡ് തുടങ്ങിയ പ്രശ്നങ്ങളും സ്ത്രീകളിൽ നെറ്റി കയറുന്നതിന് കാരണമാകുന്നു. മുടി കെട്ടുന്ന രീതികളും വലിച്ചു കെട്ടുന്നതുമൊക്കെ നെറ്റി കയറുന്നതിന് കാരണമാകുന്നുണ്ട്. താരനും വില്ലനാണ്. താരൻ മാറാനായി ഷാംപൂ ഉപയോഗിക്കുമ്പോൾ രാസവസ്തുക്കൾ മുടി വളർച്ചയെ സാരമായി ബാധിക്കുന്നു. ഷവറിലെ കുളിയും അത്ര നന്നല്ല.
ഇരുമ്പിന്റെ കുറവും വില്ലനാണ്. ശരീരത്തിന് ആവശ്യത്തിന് ഇരുമ്പ് ലഭിച്ചില്ലെങ്കിൽ രോമകൂപങ്ങളിലേക്ക് ഓക്സിജനും പോഷകങ്ങളും എത്തിക്കുന്നതിൽ നിന്ന് ചുവന്ന രക്താണുക്കളെ തടസപ്പെടുത്തും. കലോറി ഡയറ്റെടുക്കുന്നവർക്കും മുടി കൊഴിച്ചിലും നെറ്റി കയറലും സംഭവിക്കാം. അമിതമായ ഭക്ഷണക്രമം ശരീരത്തിന് ആവശ്യമായ പോഷകങ്ങൾ നഷ്ടപ്പെടുത്തും.
പോഷക സമ്പന്നമായ ആഹാരം കഴിക്കുന്നത് മുടി വളർച്ചയെ ത്വരിതപ്പെടുത്താനും നെറ്റി കയറുന്നത് കുറയ്ക്കാനും സഹായിക്കും. വെള്ളം കൃത്യമായി കുടിക്കണം. ഹെൽമറ്റ് വയ്ക്കുമ്പോൾ തുണി ഉപയോഗിച്ച് തല മൂടിയ ശേഷം വയ്ക്കാം. പ്രകൃതിദത്ത എണ്ണ തലയിൽ തേച്ച് കുളിക്കാവുന്നതാണ്. രാസവസ്തുക്കൾ അടങ്ങിയിട്ടില്ലാത്ത ഹെയർ മാസ്കുകളും ഉപയോഗിക്കാം.
