പത്തനംതിട്ട: തെങ്ങമത്ത് അരളിയില കഴിച്ച പശുവും കിടാവും ചത്തു. തെങ്ങമം സ്വദേശി പങ്കജവല്ലി അമ്മയുടെ വീട്ടിലെ പശുക്കളാണ് ചത്തത്. തീറ്റയ്ക്കൊപ്പം അബദ്ധത്തിൽ അരളിയില നൽകിയിരുന്നുവെന്ന് പങ്കജവല്ലി അമ്മ പറഞ്ഞു.
കഴിഞ്ഞ വെള്ളിയാഴ്ചയാണ് സംഭവം നടന്നത്. തീറ്റയ്ക്ക് ശേഷം പശുവിനും കിടാവിനും ദഹനക്കേടുണ്ടാവുകയാണ് ചെയ്തത്. തുടർന്ന് വെറ്ററിനറി ഡോക്ടർ സ്ഥലത്തെത്തി പരിശോധനകൾ നടത്തി. ചക്ക കഴിച്ചതിനെ തുടർന്നുള്ള ദഹനക്കേടായിരിക്കാം പശുവിനും കിടാവിനുമുണ്ടായതെന്നാണ് പ്രാഥമിക പരിശോധനയിൽ കണ്ടെത്തിയത്. ഇതിനുള്ള മരുന്നും ഡോക്ടർ നൽകിയിരുന്നു.
എന്നാൽ മരുന്ന് ഫലിക്കാതെ ആദ്യം കിടാവും, പിന്നാലെ പശുവും ചാവുകയായിരുന്നു. തുടർന്ന് പോസ്റ്റുമോർട്ടം നടത്തിയതോടെ മരണകാരണം അരളിയിലയാണെന്ന് സ്ഥിരീകരിക്കുകയായിരുന്നു.