തെന്നിന്ത്യൻ സിനിമാ ലോകത്ത് ഒരു സെലിബ്രിറ്റി വിവാഹം കൂടി. നടൻ അർജുൻ സർജയുടെ മൂത്തമകളും നടിയുമായ ഐശ്വര്യയും നടൻ തമ്പി രാമയ്യയുടെ മകനും നടനുമായ ഉമാപതിയുമായുള്ള വിവാഹ നിശ്ചയം അടുത്തിടെയാണ് നടന്നത്. വധുവിന്റെയും വരന്റെയും കുടുംബാംഗങ്ങളും അടുത്ത ബന്ധുക്കളും മാത്രം പങ്കെടുത്ത വിവാഹ നിശ്ചയ ചടങ്ങ് ഹൈദരാബാദിലെ പ്രശസ്തമായ ഒരു ഹനുമാൻ ക്ഷേത്രത്തിൽ വച്ചാണ് നടന്നത്.
ഐശ്വര്യയുടെയും ഉമാപതിയുടെയും വിവാഹ തീയതി നിശ്ചയിച്ചു എന്ന വാർത്തയാണ് ഇപ്പോൾ പുറത്തുവരുന്നത്. ജൂൺ 10നാണ് ഇരുവരുടെയും വിവാഹം. വിവാഹത്തിന്റെ ഒരുക്കങ്ങൾ ആരംഭിച്ചെന്നും ക്ഷണക്കത്തുകൾ വിതരണം ചെയ്യാൻ തുടങ്ങിയെന്നുമാണ് വാർത്തകൾ. നീണ്ടകാലത്തെ പ്രണയത്തിനൊടുവിലാണ് ഐശ്വര്യയും ഉമാപതിയും വിവാഹിതരാകുന്നത്. വിവാഹ നിശ്ചയ ചടങ്ങ് നടന്ന ഹനുമാൻ ക്ഷേത്രത്തിൽ തന്നെയായിരിക്കും വിവാഹ ചടങ്ങളും നടക്കുക.
2013ൽ വിശാൽ നായകനായ പട്ടത്തു യാനൈ എന്ന ചിത്രത്തിലൂടെയാണ് ഐശ്വര്യ അഭിനയരംഗത്തെത്തിയത്. എന്നാൽ ആദ്യ ചിത്രം പരാജയമായിരുന്നു. തുടർന്ന് അർജുൻ സർജ സംവിധാനം ചെയ്ത തമിഴ്- കന്നട ദ്വിഭാഷ ചിത്രം പ്രേമബരാഹയിലും ഐശ്വര്യ അഭിനയിച്ചിരുന്നു. 2017 ലാണ് ഉമാപതി രാമയ്യ അഭിനയ രംഗത്തേയ്ക്ക് കടന്നു വന്നത്. അധഗപ്പട്ടത് മഹാജനങ്ങളെയായിരുന്നു താരത്തിന്റെ ആദ്യ ചിത്രം.