റോം: ഗാലറിയിൽ നിന്ന് ആരാധകർ എറിഞ്ഞ വെളളക്കുപ്പി തലയിൽ കൊണ്ട് സെർബിയൻ ടെന്നീസ് താരം നൊവാക് ദ്യോക്കോവിച്ചിന് പരിക്ക്. ഇറ്റാലിയൻ ഓപ്പൺ ടൂർണമെന്റിനിടെ ആയിരുന്നു സംഭവം. രണ്ടാം റൗണ്ട് മത്സരത്തിൽ വിജയിച്ച ശേഷം ആരാധകർക്ക് ഓട്ടോഗ്രാഫ് നൽകുന്നതിനിടെ ഗാലറിയിൽ നിന്ന് വെളളക്കുപ്പി തലയിൽ പതിക്കുകയായിരുന്നു.
അപ്രതീക്ഷിതമായി തലയിൽ വെളളക്കുപ്പി പതിച്ചതോടെ വേദനയിലും ആഘാതത്തിലും ദ്യോക്കോവിച്ച് തലയിൽ കൈവെച്ച് നിലത്തിരുന്നു. രക്തം പൊടിഞ്ഞതോടെ ഉടൻ തന്നെ പ്രഥമശുശ്രൂഷയും നൽകി. താരം പിന്നീട് ഹോട്ടലിലേക്ക് മടങ്ങിയതായി പിന്നീട് ടൂർണമെന്റിന്റെ സംഘാടകരും അറിയിച്ചു.
തനിക്ക് കുഴപ്പമില്ലെന്നും മുറിവിൽ ഐസ് പാക്ക് വച്ച് ഹോട്ടലിൽ വിശ്രമിക്കുകയാണെന്നും ദ്യോക്കോവിച്ച് പിന്നീട് എക്സിലൂടെ വ്യക്തമാക്കി. ആരോഗ്യവിവരം അന്വേഷിച്ച് സന്ദേശങ്ങൾ അയച്ചവർക്ക് അദ്ദേഹം നന്ദി പറഞ്ഞു. സംഭവത്തിന്റെ വീഡിയോ ദൃശ്യങ്ങൾ പരിശോധിച്ച് വരികയാണെന്ന് ഇറ്റാലിയൻ ടെന്നീസ് ഫെഡറേഷൻ വക്താവ് അലസാന്ദ്രോ വ്യക്തമാക്കി.
