മുംബൈ: നരേന്ദ്രമോദി സർക്കാരിന്റെ നേതൃത്വത്തിൽ രാജ്യത്തെ അടിസ്ഥാന സൗകര്യ വികസന രംഗത്തുണ്ടായ കുതിപ്പിനെ അഭിനന്ദിച്ച് നടി രശ്മിക മന്ദാന. മുംബൈയിൽ നിന്ന് ഹൈദരാബാദിലേക്ക് നിരന്തരം യാത്ര ചെയ്യുന്ന നടി അടൽ സേതു പാലം വന്നതോടെ ഈ യാത്രയിലുണ്ടായ മാറ്റം വിവരിച്ചാണ് അഭിപ്രായം തുറന്നുപറഞ്ഞത്. വാർത്താ ഏജൻസിയായ എഎൻഐയ്‌ക്ക് നൽകിയ അഭിമുഖത്തിലായിരുന്നു രശ്മികയുടെ വാക്കുകൾ.
മുംബൈയെയും നവ മുംബൈയെയും ബന്ധിപ്പിക്കുന്ന അടൽ സേതു പാലം വന്നതോടെ രണ്ട് മണിക്കൂർ വേണ്ടി വരുന്ന യാത്രയുടെ സമയം 20 മിനിറ്റായി ചുരുങ്ങി. ഗതാഗത മേഖലയിൽ ഇത് ഒരു സമ്പൂർണമാറ്റമാണ് വരുത്തിയത്. പല നഗരങ്ങളിലേക്കുമുളള യാത്ര അനായാസമാക്കാൻ ഇതിലൂടെ കഴിഞ്ഞുവെന്നും രശ്മിക തുറന്നുപറഞ്ഞു.
രണ്ട് മണിക്കൂർ സമയമെടുത്തിരുന്ന ദൂരം ഇപ്പോൾ 20 മിനിറ്റ് കൊണ്ട് എത്താം. നിങ്ങൾക്ക് വിശ്വസിക്കാൻ പോലും കഴിയില്ല. ഇതൊക്കെ സാധിക്കുമെന്ന് ആരാണ് ചിന്തിച്ചത്. മുംബൈയിൽ നിന്ന് നവി മുംബൈയിലേക്കും ഗോവയിൽ നിന്ന് മുംബൈയിലേക്കും ബംഗലൂരുവിൽ നിന്ന് മുംബൈയിലേക്കും എല്ലായിടത്തേക്കുമുളള യാത്രകൾ വളരെ എളുപ്പമുളളതായി മാറിക്കഴിഞ്ഞു. ഇത്തരം അമ്പരപ്പിക്കുന്ന അടിസ്ഥാന സൗകര്യ വികസനത്തിൽ ഏറെ അഭിമാനിക്കുന്നുവെന്നും രശ്മിക പ്രതികരിച്ചു.
#WATCH | Mumbai: On the Mumbai-trans Harbour Link (MTHL) Atal Setu, Actor Rashmika Mandana says, "Who would have thought that something like this would have been possible. Now we can easily travel from Mumbai to Navi Mumbai. India is moving very fast and growing at a fast pace.… pic.twitter.com/ACwSoSNaa7
— ANI (@ANI) May 14, 2024
ഇന്ത്യയുടെ പുരോഗതിയെയും യുവാക്കളുടെ മികച്ച തീരുമാനങ്ങളെയും രശ്മിക പ്രശംസിച്ചു. രാജ്യത്തിന്റെ ഭാവിയിൽ തനിക്ക് ശുഭാപ്തിവിശ്വാസമുണ്ട്. ഇന്ത്യയിൽ ഇത് നടക്കില്ലെന്നും ഇന്ത്യയ്‌ക്കിത് അസാധ്യമാണെന്നും ഇന്ന് ഒരാൾക്കും പറയാനാകില്ല. പത്ത് വർഷത്തെ രാജ്യത്തിന്റെ വളർച്ച അത്ഭുതവും ഉജ്ജ്വലവുമാണ്. അടിസ്ഥാന സൗകര്യ വികസന മേഖല, റോഡ് വികസനത്തിലെ ആസൂത്രണം എല്ലാം. കഴിഞ്ഞ ഏഴ് വർഷത്തിനുളളിലാണ് ഇതൊക്കെ സാധ്യമായത്. ഇപ്പോൾ നമ്മുടെ സമയമാണെന്നാണ് തോന്നുന്നതെന്നും രശ്മിക പറഞ്ഞു.
ലോക്‌സഭാ തെരഞ്ഞെടുപ്പിൽ യുവ തലമുറ ഉത്തരവാദിത്വത്തോടെ വോട്ട് ചെയ്യണമെന്നും രശ്മിക അഭ്യർത്ഥിച്ചു. മറ്റൊരാൾ പറയുന്നതിന്റെ സ്വാധീന വലയത്തിൽ പെടാൻ പാടില്ല. യംഗ് ഇന്ത്യ അതിവേഗ വളർച്ചയാണ് കൈവരിക്കുന്നതെന്നും രശ്മിക പറഞ്ഞു.
