ന്യൂഡൽഹി: വ്യോമസേനയ്ക്ക് കരുത്ത് പകരാൻ ആദ്യ തേജസ് Mk-1A യുദ്ധവിമാനം ജുലൈയിൽ ലഭിച്ചേക്കുമെന്ന് പ്രതിരോധ മന്ത്രാലയം. ഹിന്ദുസ്ഥാൻ എയറോനോട്ടിക്സ് ലിമിറ്റഡിൽ (HAL) നിന്നാണ് ആദ്യത്തെ തേജസ് യുദ്ധവിമാനം വാങ്ങുന്നത്. യുദ്ധവിമാനത്തിന്റെ ഇന്റഗ്രേഷൻ ട്രയൽ നടന്നുവരികയാണ്. അടുത്ത മാസത്തോടെ മുഴുവൻ നടപടികളും പൂർത്തിയാകുമെന്ന് പ്രതിരോധ മന്ത്രാലയം അറിയിച്ചു.
48,000 കോടി രൂപയുടെ കരാർ പ്രകാരം ഇന്ത്യൻ വ്യോമസേന ഓർഡർ ചെയ്ത 83 വിമാനങ്ങളുടെ ഭാഗമാണ് തേജസ് Mk-1A യുദ്ധവിമാനം. ഇത്തരത്തിൽ 97 യുദ്ധ വിമാനങ്ങൾ കൂടി വാങ്ങാൻ വ്യോമസേന പദ്ധതിയിടുന്നു. ഇതിനായി ഹിന്ദുസ്ഥാൻ എയറോനോട്ടിക്സ് ലിമിറ്റഡിന് ടെൻഡർ നൽകിയിട്ടുണ്ട്.
യുദ്ധവിമാനങ്ങളുടെ കുറവ് നികത്തി പ്രതിരോധ മേഖല ശക്തിപ്പെടുത്തുന്നതിന്റെ ഭാഗമായാണ് 97 യുദ്ധവിമാനങ്ങൾ വാങ്ങാൻ തീരുമാനമായത്. ആത്മനിർഭർ ഭാരതത്തിന്റെ കീഴിലാണ് യുദ്ധവിമാനങ്ങൾ നിർമിക്കുന്നത്.
