നല്ല ചൂട് ഇഡ്ഡലിയും , സാമ്പാറും ഒപ്പം ഒരു വടയും കൂടിയായാൽ രാവിലത്തെ ബ്രേക്ക്ഫാസ്റ്റ് കലക്കും . പച്ചക്കറികൾ എല്ലാം ചേർന്ന സാമ്പാറും , ആവിയിൽ പാകം ചെയ്യുന്ന ഇഡ്ഡലിയും മികച്ച ആഹാരമാണെന്നാണ് ഡോക്ടർമാർ പോലും പറയുന്നത് . എന്നാൽ ഇപ്പോൾ ഇഡ്ഡലിയും പുതിയ പാചക പരീക്ഷണങ്ങൾക്ക് ഇരയാവുകയാണ് . അതും ബർഗറിലേയ്ക്ക് .
ഈ വിചിത്രവിഭവം മുംബൈയിലാണ് കിട്ടുന്നത്. ടേസ്റ്റി സ്ട്രീറ്റ് ഫുഡ് എന്ന അക്കൗണ്ടില് പങ്കുവച്ച ബർഗർ ഇഡ്ഡലി ഇതിനോടകം ഹിറ്റായി കഴിഞ്ഞു . ആദ്യം ഇഡ്ഡലി എടുത്ത് ഒരു അലൂമിനിയം ഫോയിലില് വയ്ക്കുന്നു. ഇത് നടുവേ മുറിച്ച് രണ്ടു ഭാഗങ്ങളാക്കുന്നു. ദോശക്കല്ലില് രണ്ടു ഭാഗങ്ങളില് എണ്ണ തൂവി, ഇവ രണ്ടും വയ്ക്കുന്നു. ഇതിനു മുകളിലേക്ക് നെയ്യും മയോനൈസും ചുവന്ന സോസും ചാട്ട് മസാലയും ജീരകവുമെല്ലാം ഒന്നൊന്നായി ഇടുന്നു. ശേഷം മസ്റ്റാഡ് സോസ്, മയോനൈസ്, ചുവന്ന ചട്ണി എന്നിവ ചേർക്കുന്നു.
മറു പാതി ഇഡ്ഡലിക്ക് മുകളിലേക്ക് സവാള, തക്കാളി, മല്ലിയില, അരിഞ്ഞ പച്ചമുളക് , ചീസ് ഗ്രേറ്റ് ചെയ്തത് , ബീറ്റ്റൂട്ട് ഗ്രേറ്റ് ചെയ്തത് എന്നിവ ഇടുന്നു. ഇതിനു മുകളില് മസാലക്കൂട്ട് വച്ച് വീണ്ടും ചീസ് ഇടുന്നു. തുടര്ന്ന് ബീറ്റ്റൂട്ടും സവാളയും മല്ലിയിലയും മയോനൈസും ചേര്ക്കുന്നു.
പിന്നീട് ഇഡ്ഡലിയുടെ രണ്ടുഭാഗവും ചേർത്ത് അലൂമിനിയം ഫോയിലിനു മുകളില് വച്ച് വീണ്ടും ചീസ്, ബീറ്റ്റൂട്ട്, കാരറ്റ് എന്നിവ ഗ്രേറ്റ് ചെയ്ത് ഇടുന്നു. മുകളില് അല്പ്പം മല്ലിയിലയും വിതറുന്നു. കണ്ടാല് ഒരു ബര്ഗര് പോലെ ഇരിക്കുന്ന ഇതിനു മുകളിലേക്ക് മയോനൈസ്, മസ്റ്റാഡ് സോസ് എന്നിവ തൂവുന്നു. ചട്ണി, സാമ്പാര് എന്നിവയ്ക്കൊപ്പമാണ് ഇത് വിളമ്പുന്നത്. ബാക്കിയാകുന്ന ഇഡ്ഡലിയിൽ ചെയ്യാവുന്ന പരീക്ഷണമാണിതെന്നാണ് കമന്റുകൾ .