പാലക്കാട്: കനത്ത മഴ നിലനിൽക്കുന്ന സാഹചര്യത്തിൽ വെള്ളച്ചാട്ടം കാണാനെത്തിയ 6 യുവാക്കൾ മംഗലം ഡാം കടപ്പാറയിൽ കുടുങ്ങി. കടപ്പാറ ആലിങ്ങൽ വെള്ളച്ചാട്ടം കാണാനെത്തിയ ആറ് പേരാണ് കുടുങ്ങിയത്. യുവാക്കളെ രക്ഷപ്പെടുത്തുന്നതിനായുള്ള പ്രവർത്തനങ്ങൾ അഗ്നിശമന സേനയും പൊലീസും നടത്തി വരികയാണ്.
ഇന്ന് വൈകുന്നേരമാണ് യുവാക്കൾ കടപ്പാറയിൽ അകപ്പെട്ടത്. വൈകുന്നേരത്തോടെ പെയ്ത കനത്ത മഴയിൽ പോത്തൻ തോട്ടിൽ വെള്ളം കരകവിഞ്ഞതോടെ യുവാക്കൾ ഡാം പരിസരത്ത് അകപ്പെട്ടു. ചുരുങ്ങിയ സമയത്തിനുള്ളിൽ മഴ കനക്കുകയായിരുന്നു. യുവാക്കളെ രക്ഷപ്പെടുത്താനുള്ള പ്രവർത്തനങ്ങൾ തുടങ്ങിയതായി പൊലീസ് പറഞ്ഞു.
അതേസമയം, കനത്ത മഴ തുടരുന്ന സാഹചര്യത്തിൽ സംസ്ഥാനത്തെ വിവിധ ജില്ലകളിൽ യെല്ലോ അലർട്ടും എറണാകുളത്ത് ഓറഞ്ച് അലർട്ടും പ്രഖ്യാപിച്ചിട്ടുണ്ട്. ഒറ്റപ്പെട്ടയിടങ്ങളിൽ ശക്തമായ കാറ്റിനും ഇടിമിന്നലോട് കൂടിയ ശക്തമായ മഴയ്ക്കും സാധ്യതയുള്ളതിനാൽ മലയോര മേഖലകളിൽ അപകട സാധ്യത കൂടുതലാണെന്നും പ്രദേശവാസികൾ മാറി താമസിക്കണമെന്നും ദുരന്ത നിവാരണ അതോറിറ്റിയുടെ മുന്നറിയിപ്പുണ്ട്. ഈ സാഹചര്യത്തിലാണ് വെള്ളച്ചാട്ടം കാണാൻ യുവാക്കൾ എത്തിയത്.
