ചെന്നൈ: കടുത്ത സാമ്പത്തിക പ്രതിസന്ധിയെ തുടർന്ന് വൃദ്ധസദനത്തിൽ കഴിയുന്ന നടനും സംവിധായകനുമായ മോഹൻ ശർമ്മയ്‌ക്ക് സഹായഹസ്തവുമായി തമിഴ് സൂപ്പർതാരം രജനികാന്ത്. മോഹൻ ശർമ്മയുടെ ദുരവസ്ഥ സമൂഹമാധ്യമങ്ങളിലൂടെ പുറത്തുവന്നതിന് പിന്നാലെയാണ് രജനീകാന്ത് ഒരു ലക്ഷം രൂപയുടെ അടിയന്തര സാമ്പത്തിക സഹായം കൈമാറിയത്. സഹായം ലഭിച്ച വിവരം മോഹൻ ശർമ്മ തന്നെയാണ് മാധ്യമങ്ങളോട് സ്ഥിരീകരിച്ചത്.
“എന്റെ സാഹചര്യം രജനീകാന്ത് അറിഞ്ഞതായി വിവരം ലഭിച്ചു. കുറച്ച് ദിവസങ്ങൾക്ക് മുൻപ് അദ്ദേഹത്തിൽ നിന്ന് ഒരു ലക്ഷം രൂപ സഹായമായി ലഭിച്ചു. ആ തുകയാണ് ഇപ്പോൾ എന്റെ ജീവിതത്തിന് ആശ്രയമായിരിക്കുന്നത്. പോയസ് ഗാർഡനിൽ എനിക്കൊരു വീടുണ്ടായിരുന്നു. എന്നാൽ സാമ്പത്തിക പ്രതിസന്ധി കാരണം അത് വിൽക്കേണ്ടിവന്നു. കുടുംബജീവിതവും തകർന്നു. ഇന്ന് എന്റെ കൈയിൽ പണമില്ല, പരിചരിക്കാനും ആരുമില്ല,” മോഹൻ ശർമ്മ വേദനയോടെ പറഞ്ഞു.
ചെന്നൈയ്‌ക്കടുത്തുള്ള ഗുമ്മിഡിപൂണ്ടിയിലെ ജൈന സംഘടന നടത്തുന്ന വൃദ്ധസദനത്തിലാണ് ഇപ്പോൾ മോഹൻ ശർമ്മ താമസിക്കുന്നത്. ഭക്ഷണവും താമസവും സൗജന്യമായി ലഭിക്കുന്നുണ്ടെങ്കിലും മരുന്നുകൾ വാങ്ങാൻ പോലും സാമ്പത്തിക ബുദ്ധിമുട്ട് നേരിടുകയാണെന്ന് അദ്ദേഹം പറയുന്നു.
ദേശീയ പുരസ്കാരം നേടിയ തന്റെ ‘ഗ്രാമം’ (നമ്മ ഗ്രാമം) എന്ന ചിത്രത്തിന്റെ സാറ്റലൈറ്റ് അവകാശങ്ങൾ ആരെങ്കിലും വാങ്ങുകയാണെങ്കിൽ ചികിത്സാ ചെലവുകൾക്ക് വലിയ സഹായമാകുമെന്നും അദ്ദേഹം സിനിമാ മേഖലയോട് അഭ്യർഥിച്ചു.
