മൈസൂർ: സാംസ്കാരിക നഗരമായ മൈസൂരിൽ രാമകൃഷ്ണ ആശ്രമത്തിൽ പുതുതായി നിർമ്മിച്ച സ്വാമി വിവേകാനന്ദ സാംസ്കാരിക യുവജന കേന്ദ്രം (വിവേക് സ്മാരക്) പ്രധാനമന്ത്രി നരേന്ദ്ര മോദി ശനിയാഴ്ച ഉദ്ഘാടനം ചെയ്തു. ഉദ്ഘാടനത്തിന് പിന്നാലെ അദ്ദേഹം ആശ്രമത്തിൽ കുറച്ചുനേരം ധ്യാനത്തിലിരിക്കുകയും തുടർന്ന് ആശ്രമ പരിസരത്ത് ഒരു തൈ നട്ട് പരിസ്ഥിതി സംരക്ഷണ സന്ദേശവും നൽകി.
ഏകദേശം 45 കോടി രൂപ ചെലവിലാണ് സ്വാമി വിവേകാനന്ദ സാംസ്കാരിക യുവജന കേന്ദ്രം നിർമ്മിച്ചിരിക്കുന്നത്. യുവാക്കൾക്കിടയിൽ സാംസ്കാരികവും ആത്മീയവുമായ മൂല്യങ്ങൾ വളർത്തിയെടുക്കുക എന്ന ലക്ഷ്യത്തോടെയാണ് ഈ കേന്ദ്രം സ്ഥാപിച്ചിരിക്കുന്നത്. 1892-ൽ സ്വാമി വിവേകാനന്ദൻ മൈസൂരിൽ താമസിച്ച ചരിത്രസംഭവത്തിന്റെ സ്മരണയ്ക്കായാണ് നാരായണ ശാസ്ത്രി റോഡിലുള്ള അദ്ദേഹത്തിന്റെ വസതിയെ ആസ്പദമാക്കി ഈ സ്മാരകം ഒരുക്കിയത്.
മണ്ടക്കള്ളി വിമാനത്താവളത്തിൽ നിന്ന് പ്രത്യേക ഹെലികോപ്റ്ററിൽ ഓവൽ ഗ്രൗണ്ടിലെത്തിയ പ്രധാനമന്ത്രിയെ ഗവർണർ തവർചന്ദ് ഗെലോട്ട്, മുഖ്യമന്ത്രി ഡി.കെ. ശിവകുമാർ, മന്ത്രി യതീന്ദ്ര സിദ്ധരാമയ്യ എന്നിവർ ചേർന്ന് സ്വീകരിച്ചു. തുടർന്ന് റോഡ് മാർഗം രാമകൃഷ്ണ ആശ്രമത്തിലെത്തിയ അദ്ദേഹം വിവേക് സ്മാരകം ഉദ്ഘാടനം ചെയ്ത് പൊതുജനങ്ങളെ അഭിസംബോധന ചെയ്തു. തുടർന്ന് രാമകൃഷ്ണ ആശ്രമ സ്കൂളും അദ്ദേഹം സന്ദർശിച്ചു. ഔദ്യോഗിക പരിപാടികൾ പൂർത്തിയാക്കിയ ശേഷം പ്രധാനമന്ത്രി ന്യൂഡൽഹിയിലേക്ക് മടങ്ങും.
പ്രധാനമന്ത്രിയുടെ സന്ദർശനത്തോടനുബന്ധിച്ച് മൈസൂർ നഗരത്തിൽ കർശന സുരക്ഷാ ക്രമീകരണങ്ങളാണ് ഏർപ്പെടുത്തിയിരുന്നത്. വിമാനത്താവളം, ഹെലിപാഡ്, രാമകൃഷ്ണ ആശ്രമം എന്നിവിടങ്ങളിൽ മുതിർന്ന പോലീസ് ഉദ്യോഗസ്ഥരെയും സുരക്ഷാ സേനയെയും വിന്യസിച്ചു. ഒന്നിലധികം തലങ്ങളിലുള്ള സുരക്ഷാ പരിശോധനകൾക്ക് ശേഷമാണ് പരിപാടി നടക്കുന്ന വേദിയിലേക്ക് പ്രവേശനം അനുവദിച്ചത്. നഗരത്തിലെ പ്രധാന റോഡുകളിൽ ഗതാഗത നിയന്ത്രണവും ഏർപ്പെടുത്തിയിരുന്നു. പൊതുജനങ്ങൾ ബദൽ വഴികൾ ഉപയോഗിക്കണമെന്ന് പോലീസ് നിർദേശിക്കുകയും സുരക്ഷാ നിർദേശങ്ങളോട് സഹകരിക്കണമെന്ന് അഭ്യർത്ഥിക്കുകയും ചെയ്തു.
പ്രധാനമന്ത്രിയുടെ സന്ദർശനത്തിന് മുന്നോടിയായി മുഖ്യമന്ത്രി ഡി.കെ. ശിവകുമാർ മൈസൂരിലെത്തി ചാമുണ്ഡി കുന്നിലെ ചാമുണ്ഡേശ്വരി ദേവി ക്ഷേത്രത്തിൽ പ്രത്യേക പ്രാർത്ഥനകൾ നടത്തി. തുടർന്ന് അദ്ദേഹം പ്രധാനമന്ത്രിയെ സ്വീകരിക്കുകയും ഉദ്ഘാടന ചടങ്ങിലും പൊതുപരിപാടിയിലും പങ്കുചേരുകയും ചെയ്തു.
ഈ വർഷം മൈസൂരിൽ നടന്ന പ്രധാന പൊതുപരിപാടികളിലൊന്നായി മാറിയ വിവേക സ്മാരക ഉദ്ഘാടനച്ചടങ്ങിൽ മതനേതാക്കൾ, ജനപ്രതിനിധികൾ, ഉദ്യോഗസ്ഥർ, വിദ്യാർത്ഥികൾ, ആയിരക്കണക്കിന് ഭക്തർ എന്നിവർ പങ്കെടുത്തു. സ്വാമി വിവേകാനന്ദന്റെ ആദർശങ്ങളും സന്ദേശങ്ങളും യുവതലമുറയിലേക്ക് കൂടുതൽ ശക്തമായി എത്തിക്കുന്ന കേന്ദ്രമായി ഈ സാംസ്കാരിക യുവജന കേന്ദ്രം പ്രവർത്തിക്കുമെന്ന പ്രതീക്ഷയിലാണ് സംഘാടകർ.
