പതിറ്റാണ്ടുകളായി ബിജെപിയുടെ കോട്ടയായി തുടരുന്ന ലക്നൗവിൽ നിന്ന് തുടർച്ചയായി മൂന്നാം തവണയും എംപിയായി കേന്ദ്രമന്ത്രി സഭയിൽ എത്തിയ മുൻ പ്രതിരോധമന്ത്രി രാജ്നാഥ് സിംഗ്. 2024 മേയ് 20നാണ് ലക്നൗവിൽ ജനങ്ങൾ വിധിയെഴുതിയത്. ജൂൺ നാലിന് രാജ്യം കാത്തിരുന്ന ഫലപ്രഖ്യാപനമുണ്ടായപ്പോൾ ലക്നൗവിലെ ജനവിധി ഏവർക്കും ഊഹിക്കാവുന്നതായിരുന്നു.
രാജ്യത്തെ സേവിക്കാൻ അദ്ദേഹം കാണിക്കുന്ന സന്നദ്ധത തന്നെയാണ് മറ്റ് നേതാക്കളിൽ നിന്നും രാജ്നാഥ്സിംഗിനെ ജനപ്രിയനാക്കുന്നത്. എതിരാളികൾ പോലും ആദരിക്കുന്ന ഘനഗാംഭീര്യമായ ശബ്ദം. പൊതുസേവന രംഗത്ത് തിളങ്ങുന്ന പ്രവർത്തനം. ചുമതലകളിൽ അണുവിട വ്യതിചലിക്കാത്ത കർക്കശക്കാരൻ. യുപിയിൽ ബിജെപി സംസ്ഥാന സെക്രട്ടറി, യുവമോർച്ചയുടെ അദ്ധ്യക്ഷൻ, ബിജെപി ദേശീയ അദ്ധ്യക്ഷൻ തുടങ്ങി സംഘടനാ പ്രവർത്തനത്തിന്റെ വിവിധ ഏടുകളിൽ പ്രകടനം കാഴ്ചവെച്ച നേതാവാണ് അദ്ദേഹം. യുപിയിലെ കെബി പോസ്റ്റ് ഗ്രാജ്വേറ്റ് കോളജിൽ ഫിസിക്സ് ലക്ചററായിരുന്നു രാജ്നാഥ് സിംഗ്.
യുപിയിലെ ചന്ദൗലി ജില്ലയിലെ ബബോറയാണ് രാജ്നാഥ് സിംഗിന്റെ ജൻമസ്ഥലം. മന്ത്രിയായിരിക്കെ കൈകാര്യം ചെയ്ത വകുപ്പുകളിൽ രാജ്നാഥ് സിംഗ് കൊണ്ടുവന്ന മാറ്റങ്ങൾ ശ്രദ്ധേയമായിരുന്നു. 1991-1992 കാലഘട്ടത്തിൽ വിദ്യാഭ്യാസ മന്ത്രിയായിരിക്കുന്ന കാലത്തായിരുന്നു ശാസ്ത്ര ഗ്രന്ഥങ്ങൾ നവീകരിച്ച് വേദ ഗണിതത്തെ സിലബസിൽ ഉൾപ്പെടുത്തിയത്. ഇതിനുപുറമെ ആന്റി- കോപ്പിയിംഗ് നിയമവും അദ്ദേഹം പാസാക്കി. വിദ്യാഭ്യാസ സമ്പ്രദായങ്ങൾ പൊളിച്ചെഴുതികൊണ്ടായിരുന്നു അദ്ദേഹം വിദ്യാഭ്യാസ മന്ത്രിയിൽ നിന്ന് കേന്ദ്ര ഗതാഗതമന്ത്രിയായത്.
1994 ഏപ്രിലിൽ, അദ്ദേഹം രാജ്യസഭയിലേക്ക് തെരഞ്ഞെടുക്കപ്പെട്ടു. വ്യവസായ ഉപദേശക സമിതി, കൃഷി മന്ത്രാലയത്തിന്റെ കൺസൾട്ടേറ്റീവ് കമ്മിറ്റി, ബിസിനസ് ഉപദേശക സമിതി, ഹൗസ് കമ്മിറ്റി, കമ്മിറ്റി തുടങ്ങിയ സമിതികളുടെ ഭാഗമായി. 1997 മാർച്ച് 25-ന് രാജ്നാഥ്സിംഗ് ബി.ജെ.പിയുടെ ഉത്തർപ്രദേശ് യൂണിറ്റിന്റെ പ്രസിഡന്റായി. 1999-ൽ കേന്ദ്ര ഉപരിതല ഗതാഗത മന്ത്രിയായും അദ്ദേഹം സേവനമനുഷ്ഠിച്ചു.
2000ൽ ഉത്തർപ്രദേശിന്റെ മുഖ്യമന്ത്രിയായി അദ്ദേഹം ചുമതലയേറ്റു. ഒരു സമുദായത്തിന് മാത്രം ജോലി നൽകിയിരുന്ന സമാജ്വാദി പാർട്ടിയുടെ നയങ്ങളെ പൊളിച്ചടുക്കി തൊഴിൽ വിവേചനം ഇല്ലാതാക്കാനും ക്രമസമാധാനം നിലനിർത്താനും അദ്ദേഹം പ്രവർത്തിച്ചു. കേന്ദ്ര കൃഷി മന്ത്രി, കേന്ദ്ര ആഭ്യന്തര മന്ത്രി, കേന്ദ്ര പ്രതിരോധ മന്ത്രി എന്നീ പദവികളിലും മികച്ച പ്രവർത്തനം കാഴ്ചവെച്ചു.
കഴിഞ്ഞ അഞ്ച് വർഷത്തിനിടെ അദ്ദേഹം രാജ്യത്തിനായി സമർപ്പിച്ച സേവനങ്ങൾ എടുത്തു പറയേണ്ടവയാണ്. ലക്നൗ നഗരത്തിലെ തിരക്ക് നിയന്ത്രിക്കാൻ അര ഡസനിലധികം മേൽപ്പാലങ്ങളാണ് ഉയർന്നുവന്നത്. അദ്ദേഹം പ്രതിരോധ മന്ത്രിയായിരിക്കെ, നഗരം ബ്രഹ്മോസ് മിസൈൽ നിർമാണത്തിന്റെ കേന്ദ്രമായി മാറി. ലക്നൗ വിമാനത്താവളത്തോടൊപ്പം ഗോമതിനഗർ റെയിൽവേ സ്റ്റേഷനും നവീകരിച്ചു.
2024ൽ എത്തിയപ്പോഴും രാജ്നാഥ് സിംഗിന് അനുകൂലവിധിയാണ് ലക്നൗ കാത്തുവച്ചത്. എസ് പി ടിക്കറ്റിൽ മൂന്ന് തവണ മത്സരിച്ച് എംഎൽഎ ആയ ഇൻഡി സഖ്യത്തിന്റെ സ്ഥാനാർത്ഥി രവിദാസ് മെഹ്റോത്രയെ പരാജയപ്പെടുത്തിയാണ് അദ്ദേഹം ലോക്സഭയിൽ വീണ്ടുമെത്തിയത്. 6,12,709 വോട്ടുകളാണ് അദ്ദേഹം നേടിയത്.
