തൃശൂർപൂരം പോലെയൊരു ആകാശപ്പൂരം . 80 വര്ഷത്തിലൊരിക്കല് നടക്കുന്ന ഈ ആകാശപ്പൂരം കൊറോണ ബോറിയാലിസ് അഥവാ ബ്ലേസ് സ്റ്റാര് എന്ന നക്ഷത്ര സമൂഹമാണ് ഒരുക്കുന്നത് . വെള്ളക്കുള്ളന് നക്ഷത്രം ആകാശത്ത് പൊട്ടിത്തെറിക്കാന് ഒരുങ്ങുകയാണെന്ന് നാസയാണ് മുന്നറിയിപ്പ് നൽകിയിരിക്കുന്നത് .
ദശലക്ഷക്കണക്കിന് മൈലുകള് ദൂരെയുള്ള ഈ സ്ഫോടനം, നഗ്ന നേത്രങ്ങള് കൊണ്ട് കാണാനാകും . ഒരു വെള്ളക്കുള്ളന് നക്ഷത്രവും പുരാതന ചുവപ്പ് ഭീമനും ചേര്ന്നതാണ് ബ്ലേസ് സ്റ്റാര്. ബ്ലേസ് സ്റ്റാറിലെ ആദ്യ നോവ അഥവാ ആകാശപ്പൂരം നടന്നത് 1946ലാണെന്ന് ശാസ്ത്രജ്ഞര് പറയുന്നു.
നക്ഷത്ര പരിണാമത്തിലെ ഏറ്റവും ഒടുവിലത്തെ അവസ്ഥയാണ് വെള്ളക്കുള്ളന്. ചുവപ്പ് ഭീമന്മാരാകട്ടെ അന്ത്യാവസ്ഥയിലേക്ക് അടുത്തുകൊണ്ടിരിക്കുന്ന നക്ഷത്രങ്ങളുമാണ്. ഇവ ബഹിരാകാശത്തിലേക്ക് വസ്തുക്കള് പുറന്തള്ളിക്കൊണ്ടിരിക്കുകയും ചെയ്യും. വെള്ളക്കുള്ളനില് നിന്നുള്ള ഗുരുത്വ ബലം തൊട്ടടുത്തുള്ള ചുവപ്പ് ഭീമന് പുറന്തള്ളുന്ന സൗരവസ്തുക്കളെ അതിവേഗത്തിലാണ് വലിച്ചെടുക്കുക.
ഉള്ക്കൊള്ളാനാകുന്നത്രയും സൗരവസ്തുക്കള് ശേഖരിക്കപ്പെടുന്നതിന് പിന്നാലെ വെള്ളക്കുള്ളനിലെ താപവും മര്ദവും വര്ധിക്കുകയും ഇത് തെര്മോ ന്യൂക്ലിയര് പൊട്ടിത്തെറിയില് കലാശിക്കുകയും ചെയ്യുന്നു. ഈ സ്ഫോടനത്തിന് പിന്നാലെ വെള്ളക്കുള്ളന് നക്ഷത്രം പൂര്വാധികം ശോഭയേറിയതായി മാറും. പൊട്ടിത്തെറി സംഭവിച്ച് കഴിഞ്ഞാല് നക്ഷത്രം മെല്ലെ അതിന്റെ യഥാര്ഥ വെളിച്ചത്തിലേക്ക് മാറുകയും ചെയ്യും. ഈ പ്രതിഭാസത്തെയാണ് നോവ അഥവാ ആകാശപ്പൂരം എന്ന് വിളിക്കുന്നത്.
നോവ ഉണ്ടായതായി ശ്രദ്ധയില്പ്പെട്ടാല് ഉടന് തന്നെ ഇ-മെയില് വഴിയോ, സമൂഹമാധ്യമങ്ങള് വഴിയോ വിവരങ്ങള് പങ്കുവയ്ക്കണമെന്നും നാസയിലെ അസ്ട്രോപാര്ടിക്ള് ഫിസിക്സ് ലാബിലെ ചീഫായ എലിസബത്ത് ഹേസ് പറയുന്നു.
