ന്യൂഡൽഹി: മദ്യനയ അഴിമതിക്കേസിൽ തന്റെ ജാമ്യാപേക്ഷ താൽക്കാലികമായി സ്റ്റേ ചെയ്ത ഹൈക്കോടതി വിധിക്കെതിരെ സുപ്രീംകോടതിയെ സമീപിച്ച് ഡൽഹി മുഖ്യമന്ത്രി അരവിന്ദ് കെജ്‌രിവാൾ. കെജ്‌രിവാളിന് ജാമ്യം അനുവദിച്ച വിചാരണക്കോടതി നടപടിക്കെതിരെ ഇഡി ഹൈക്കോടതിയിൽ ഹർജി നൽകിയിരുന്നു. ഇത് പരിഗണിക്കവെയാണ് കോടതി കെജ്‌രിവാളിന്റെ ജാമ്യം താത്കാലികമായി റദ്ദാക്കി ഹർജി വിധി പറയാനായി മാറ്റിയത്.
തന്റെ ജാമ്യത്തിനെതിരായ ഹർജി പരിഗണിച്ച ഹൈക്കോടതിക്ക് പിഴവ് സംഭവിച്ചിട്ടുണ്ടെന്നും നടപടി വസ്തുനിഷ്ഠമായ മാനദണ്ഡപ്രകാരമല്ലെന്നും അതിനാൽ ജാമ്യം റദ്ദാക്കിയ ഉത്തരവ് നിലനിൽക്കില്ലെന്നും കെജ്‌രിവാൾ സുപ്രീം കോടതിയിൽ സമർപ്പിച്ച ഹർജിയിൽ പറയുന്നു. കേസ് ഇന്നുതന്നെ പരിഗണിക്കണമെന്നും കെജ്‌രിവാളിന്റെ അഭിഭാഷകൻ കോടതിയോട് ആവശ്യപ്പെട്ടു.
ഡൽഹി മദ്യനയ അഴിമതിക്കേസുമായി ബന്ധപ്പെട്ട മാർച്ച് 21നാണ് ഡൽഹി മുഖ്യമന്ത്രിയും ആം ആദ്മി നേതാവുമായ അരവിന്ദ് കെജ്‌രിവാളിനെ എൻഫോഴ്‌സ്‌മെന്റ് ഡയറക്ടറേറ്റ് അറസ്റ്റ് ചെയ്‍തത്. പൊതുതെരഞ്ഞെടുപ്പ് കണക്കിലെടുത്ത് മെയ്യിൽ സുപ്രീം കോടതി അദ്ദേഹത്തിന് ഇടക്കാല ജാമ്യം അനുവദിച്ചിരുന്നു. ജൂൺ 2 ന് ജയിലിൽ മടങ്ങിയെത്തിയ കെജ്‌രിവാൾ ആരോഗ്യാവസ്ഥ ചൂണ്ടിക്കാട്ടി വീണ്ടും ജാമ്യത്തിനായി വിചാരണകോടതിയെ സമീപിക്കുകയായിരുന്നു.
