ബെംഗളൂരു: രേണുക സ്വാമി കൊലക്കേസിൽ മുഖ്യ പ്രതികളിൽ ഒരാളായ നടി പവിത്ര ഗൗഡ പൊലീസ് കസ്റ്റഡിയിൽ മേക്കപ്പ് ധരിച്ച് കണ്ടതിനെത്തുടർന്ന് വനിതാ സബ് ഇൻസ്പെക്ടർക്ക് നോട്ടീസ് നൽകി കർണാടക പൊലീസ്. സംഭവത്തിൽ വിശദീകരണം ആവശ്യപ്പെട്ടാണ് നോട്ടീസ്. കേസിൽ അറസ്റ്റിലായ രണ്ടാം പ്രതി കന്നഡ സൂപ്പർസ്റ്റാർ ദർശൻ തൂഗുദീപയും മറ്റ് 15 പേരും നിലവിൽ ജുഡീഷ്യൽ കസ്റ്റഡിയിലാണുള്ളത്.
ഒന്നാം പ്രതി പവിത്രയെ ബെംഗളൂരുവിലെ വസതിയിൽ എത്തിച്ച് തെളിവെടുപ്പ് നടത്തിയിരുന്നു. ഇവർ പൊലീസ് ഉദ്യോഗസ്ഥർക്കൊപ്പം തെളിവെടുപ്പ് കഴിഞ്ഞ് മടങ്ങുന്ന വീഡിയോകളിൽ മുഖത്ത് മേക്കപ്പും ലിപ്സ്റ്റിക്കും അണിഞ്ഞ് പുഞ്ചിരിച്ചുകൊണ്ട് നടന്നുനീങ്ങുന്നത് കാണാമായിരുന്നു. ഈ ദൃശ്യങ്ങളാണ് പവിത്രയ്ക്ക് കസ്റ്റഡിയിൽ പ്രത്യേക പരിഗണ ലഭിക്കുന്നുണ്ടോ എന്ന ചർച്ചകൾക്ക് തുടക്കമിട്ടത്.
പവിത്ര എല്ലാ ദിവസവും രാത്രി തന്റെ മേക്കപ്പ് ബാഗ് സൂക്ഷിച്ചിരുന്ന വീട്ടിലാണ് തങ്ങിയിരുന്നത്. വനിതാ സബ് ഇൻസ്പെക്ടർ എന്നും രാവിലെ ഇവിടെ പോയി പവിത്രയെ എപി നഗർ പൊലീസ് സ്റ്റേഷനിലേക്ക് കൂട്ടികൊണ്ട് പോവുകയാണ് ചെയ്തിരുന്നത്. വനിതാ എസ്ഐയ്ക്ക് അത് തടയാമായിരുന്നുവെന്നും അതിൽ വിശദീകരണം തേടിയാണ് നോട്ടീസ് നൽകിയതെന്നും ഡിസിപി ഗിരീഷ് പറഞ്ഞു.
കന്നഡ താരം ദർശന്റെ സുഹൃത്തായ പവിത്രയ്ക്ക് രേണുകസ്വാമി അശ്ലീല സന്ദേശങ്ങൾ അയച്ചതിന്റെ പേരിലായിരുന്നു കൊലപാതകം. നടന്റെ വീട്ടിൽ വച്ച് മർദ്ദിച്ച് കൊലപ്പെടുത്തിയ ശേഷം മൃതദേഹം അഴുക്കുചാലിൽ തള്ളുകയായിരുന്നു.
