ന്യൂഡൽഹി: കനത്ത മഴയെ തുടർന്ന് ഡൽഹിയിലെ വിവിധയിടങ്ങളിൽ രൂപപ്പെട്ട വെള്ളക്കെട്ടുകൾകൊണ്ട് ജനങ്ങളാകെ വലഞ്ഞിരിക്കുകയാണ്. കൊച്ചുകുട്ടികൾ മുതൽ മുതിർന്നവർ വരെ വെള്ളക്കെട്ടിലൂടെ നടന്നും നീന്തിയും പോകുമ്പോൾ സമാജ്‌വാദി പാർട്ടി എംപി രാംഗോപാൽ യാദവിന്റെ വീഡിയോയാണ് സമൂഹമാദ്ധ്യമങ്ങളിൽ ചർച്ചയാവുന്നത്.
പുറത്തേക്കിറങ്ങാൻ നിൽക്കുമ്പോഴാണ് വാഹനം നിർത്തിയിട്ട ഭാഗത്ത് വെള്ളക്കെട്ടുള്ളത് എംപിയുടെ ശ്രദ്ധയിൽപ്പെട്ടത്. വെള്ളക്കെട്ടിൽ ഇറങ്ങാൻ മടിയായതോടെ ഒപ്പമുണ്ടായിരുന്ന അനുയായികളെ കൊണ്ട് തന്നെ പൊക്കിയെടുക്കാൻ എംപി ആവശ്യപ്പെടുകയായിരുന്നു. രണ്ട് അനുയായികൾ ചേർന്ന് എപിയെ താങ്ങിപ്പിടിച്ചുകൊണ്ട് കാറിന്റെ സമീപത്തേക്ക് വരുന്നതിന്റെ വീഡിയോ സമൂഹമാദ്ധ്യമങ്ങളിൽ പ്രചരിച്ചതോടെ രാംഗോപാൽ യാദവിനെതിരെ വിമർശനവുമായി ബിജെപിയും സമൂഹമാദ്ധ്യമ ഉപയോക്താക്കളും രംഗത്തെത്തി.
लोगों का शोषण ही तो समाजवाद है। pic.twitter.com/IH7HVBj2Ri
— Amit Malviya (@amitmalviya) June 28, 2024
ജനങ്ങളെ ചൂഷണം ചെയ്യുന്നതാണ് സോഷ്യലിസം എന്ന് പരിഹസിച്ച് ബിജെപി നേതാവ് അമിത് മാളവ്യ വീഡിയോ പങ്കുവച്ച് എക്‌സിൽ കുറിച്ചു. ചെരുപ്പുകളിൽ അഴുക്ക് പുരളുന്നത് പോലും എംപിക്ക് ഇഷ്ടമില്ല. അതുകൊണ്ടാണ് അനുയായികളെ കൊണ്ട് എടുപ്പിച്ചത്. ഇങ്ങനെയുള്ളവർ എങ്ങനെ ജനസേവനം നടത്തും തുടങ്ങി ഒട്ടനവധി വിമർശനങ്ങളാണ് വീഡിയോയ്‌ക്ക് ലഭിച്ചത്.
