ഇലത്തുമ്പിലിരുന്ന് വിശ്രമിക്കുന്ന നാട്ടു ബുൾബുൾ പക്ഷി. ലേലത്തിന് വച്ച മമ്മൂട്ടിയുടെ നാട്ടു ബുൾബുൾ പക്ഷിയുടെ ചിത്രം വിറ്റുപോയത് 3 ലക്ഷം രൂപയ്‌ക്ക്. ലീന ഗ്രൂപ്പ് ഓഫ് ബിസിനസിന്റെ ചെയർമാനും മലപ്പുറം കോട്ടയ്‌ക്കൽ സ്വദേശിയുമായ അച്ചു ഉള്ളാട്ടിലാണ് ചിത്രം പൊന്നുംവില നൽകി സ്വന്തമാക്കിയത്. 1 ലക്ഷം രൂപയായിരുന്നു ചിത്രത്തിന് ഇട്ട അടിസ്ഥാന വില.
ഫോട്ടോഗ്രാഫറായ ഇന്ദുചൂഡന്റെ പേരിലുള്ള ഇന്ധുചൂഡൻ ഫൗണ്ടഷനും ഞാറ്റുവേല സംഘടനയും ചേർന്നാണ് പ്രദർശനം നടത്തിയത്. അച്ചു ഉള്ളാട്ടിനെ പ്രതിനിധീകരിച്ചെത്തിയ കലാവിമർശകൻ എം. രാമചന്ദ്രന് നടൻ വികെ ശ്രീരാമൻ ചിത്രം കൈമാറി. ഇന്ദുചൂഡൻ ഫൗണ്ടേഷന്റെ അംഗങ്ങളിലൊരാളാണ് നടൻ വികെ ശ്രീരാമൻ.
ലേലത്തിൽ വിറ്റുകിട്ടുന്ന പണം ഫൗണ്ടേഷൻ പ്രവർത്തനങ്ങൾക്കുള്ളതാണ്. ‘പാടി പറക്കുന്ന മലയാളം’ എന്ന പേരിൽ സംഘടിപ്പിച്ച പ്രദർശനത്തിൽ 23 ഫോട്ടോഗ്രാഫേഴ്‌സിന്റെ ചിത്രങ്ങളായിരുന്നു ഉൾപ്പെടുത്തിയത്. കേരളത്തിന് അകത്തും പുറത്തുമായിയുള്ള ഫോട്ടോഗ്രാഫേഴ്‌സ് പകർത്തിയ 30ലേറെ പക്ഷികളുടെ ചിത്രങ്ങളാണ് ദർബാർ ഹാളിൽ പ്രദർശനത്തിന് വച്ചത്.
