ന്യൂഡൽഹി: രാഷ്‌ട്രപതി ദ്രൗപദി മുർമുവിനെ സന്ദർശിച്ച് കരസേനാ മേധാവി ജനറൽ ഉപേന്ദ്ര ദ്വിവേദി. ഭാര്യയോടൊപ്പമാണ് അദ്ദേഹം രാഷ്ട്രപതിയെ സന്ദർശിക്കാനെത്തിയത്. രാഷ്‌ട്രപതി ഭവനിലെത്തിയ കരസേനാ മേധാവിയെ പൂച്ചെണ്ട് നൽകിയാണ് രാഷ്‌ട്രപതി സ്വീകരിച്ചത്. ഇന്ത്യൻ കരസേനാ മേധാവിയായി അധികാരമേറ്റ ശേഷമുള്ള ആദ്യ കൂടിക്കാഴ്ചയാണിത്.
ജൂൺ 30-നാണ് ഇന്ത്യയുടെ 30-ാമത്തെ കരസേനാ മേധാവിയായി ജനറൽ ഉപേന്ദ്ര ദ്വിവേദി ചുമതലയേറ്റത്. ജനറൽ മനോജ് പാണ്ഡെ വിരമിച്ചതോടെയാണ് ഉപമേധാവിയായി സേവനം അനുഷ്ഠിക്കുകയായിരുന്ന ഉപേന്ദ്ര ദ്വിവേദി കരസേനയുടെ മേധാവി പദവിയിലേക്കെത്തിയത്.
40 വർഷത്തെ സേവനത്തിനിടയിൽ സ്റ്റാഫ്, ഇൻസ്ട്രക്ഷണൽ, വിദേശ നിയമനങ്ങൾ തുടങ്ങീ സേനയിലെ വിവിധ മേഖലകളിൽ ജനറൽ ഉപേന്ദ്ര ദ്വിവേദി സേവനമനുഷ്ഠിച്ചിരുന്നു. മികച്ച സേവനങ്ങൾക്ക് അദ്ദേഹത്തിന് രാജ്യം പരം വിശിഷ്ട് സേവാ മെഡൽ, അതി വിശിഷ്ട് സേവാ മെഡൽ തുടങ്ങിയ പുരസ്കാരങ്ങൾ നൽകി ആദരിച്ചിട്ടുണ്ട്.
